Read Uzbek Muqaddas Kitob Zabur 31 Bible Online

Zabur 31 - Uzbek Muqaddas Kitob bible

Zabur 31

¹Dovud qasidasi[59]. Itoatsizligi kechirilganlar baxtlidir, Egamiz kimning gunohidan oʻtgan boʻlsa, Oʻsha inson baxtlidir.

²Egamiz kimning aybini yozmagan boʻlsa, Oʻsha inson baxtlidir, Ruhida hiyla boʻlmaganlar baxtlidir.

³Ey Egam, gunohimni boʻynimga olmay, rad qilganimda, Tanam qoq suyak boʻlib qolgandi, Kun boʻyi oh — voh qilib chiqardim.

⁴Kechayu kunduz tarbiya berishdan toʻxtamading, Saraton issigʻidagiday madorim qurib qoldi.

⁵Endi oldingda gunohimni e’tirof etdim, Aybimni yashirmay, oʻzim aytdim: “Egam oldida itoatsizligimni boʻynimga olaman.” Sen esa mening gunohimni kechirding.

⁶Shu bois har bir taqvodor Vaqt borida Senga ibodat qilsin. Shunda azim suvlar toʻfoni Taqvodorlarga yetib bormas.

⁷Sen mening panohimsan, Meni kulfatlardan Sen asraysan, Najot qoʻshigʻi ila meni oʻraysan.

⁸Egamiz aytar: “Sizlarga Men yoʻl koʻrsataman, Yuradigan yoʻllaringizni oʻrgataman, Maslahat beraman, sizlarni kuzataman.

⁹Ongsiz ot yoki xachir kabi boʻlmanglar, Ularni yoʻlga solmoq uchun suvluq, jilov kerak, Boʻlmasa ular yoningizga kelmaydi.”

¹⁰Fosiqning azobi koʻpdir, Lekin Egamizdan umidvorlarni Sodiq sevgi qurshab oladi.

¹¹Ey solihlar, Egamiz tufayli shodlaning, quvoning! Ey barcha koʻngli poklar, shodlikdan kuylang!