Read Uzbek Muqaddas Kitob Zabur 33 Bible Online

Zabur 33 - Uzbek Muqaddas Kitob bible

Zabur 33

¹Dovud Abumalek oldida oʻzini telbalikka solib, uning huzuridan quvilgandan keyin[61] aytgan sanosi.

²[62] Har doim Egamni olqishlayman, Uning madhi tilimdan aslo tushmaydi.

³Egam bois jonim faxrlanadi, Mazlum eshitib, shod boʻlsin.

⁴Men bilan birga olqishlang Egamni, Birgalikda ulugʻlaylik Uning nomini.

⁵Egamga yuz burdim, U javob berdi, Hamma qoʻrquvlardan U xalos qildi.

⁶Egamizdan umid qilganlarning yuzlarida nur, Ularning yuzlari aslo shuvut boʻlmaydi.

⁷Bu bechora iltijosin Egamiz eshitdi, Barcha uqubatlardan uni qutqardi.

⁸Egamizdan qoʻrqqanlarning atrofida Egamizning farishtasi qarorgoh qurib, Ularga najot baxsh etadi.

⁹Egamizning muruvvatini tatib koʻr, Egamiz yaxshi ekanligini bilib ol. Naqadar baxtlidir Unda panoh topganlar.

¹⁰Ey taqvodorlar, Egamizdan qoʻrqing. Undan qoʻrqqanlar aslo muhtojlik koʻrmas.

¹¹Hatto yirtqich sherlar ovqatsiz, Ular ochlikdan azob chekadi. Egamizga yuz burganlardan esa Farovonlik ayrilmaydi.

¹²Keling, ey bolalar, tinglangiz meni, Oʻrgatayin men Egamizdan qoʻrqishni.

¹³Hayotdan zavqlanishni, Baxtli uzoq umr koʻrishni istaysizmi?

¹⁴Demak, tilingizni yomon soʻzlardan tiying, Ogʻzingizni yolgʻon gaplardan asrang.

¹⁵Yomonlikdan qayting, yaxshilik qiling, Tinchlik istang, ha, tinchlik payida boʻling.

¹⁶Egamiz solihlarni kuzatib turadi, Ularning nolasini Egamiz eshitadi.

¹⁷Badkirdorlardan esa yuz oʻgiradi, Ularning xotirasini yer yuzidan oʻchiradi.

¹⁸Taqvodorlar yolvoradi, Egamiz eshitadi, Barcha balolardan ularni Egamiz qutqaradi.

¹⁹Koʻngli choʻkkanlarga Egamiz yaqindir, Ruhan ezilganlarni U qutqaradi.

²⁰Solihlarning qaygʻulari koʻp boʻlsa, Hamma qaygʻulardan Egamiz xalos qilar.

²¹Ularning oʻzini Egamiz saqlaydi, Bironta ham suyagi sindirilmaydi.

²²Fosiqqa oʻz yovuzligi oʻlim keltiradi, Solihdan nafratlangan mahkum boʻladi.

²³Egamiz Oʻz qullarining hayotini qutqaradi, Egamizda panoh topuvchilar mahkum boʻlmaydi.