Read Uzbek Muqaddas Kitob Zabur 34 Bible Online

Zabur 34 - Uzbek Muqaddas Kitob bible

Zabur 34

¹Dovud sanosi. Ey Egam, menga qarshi chiqqanlarga Oʻzing qarshi boʻl. Menga hujum qilganlar bilan Oʻzing jang qil.

²Qalqonu sovutingni ol, Qani, menga yordamga kel.

³Meni ta’qib qilganlarga qarshi Nayzayu boltangni olgin. “Senga najot beraman”, deb Oʻzing menga va’da bergin.

⁴Mening jonimga qasd qilganlar Sharmandayu sharmisor boʻlsin! Menga qarshi fitna qilayotganlar Uyatga qolib, orqaga qaytsin!

⁵Ey Egam, Sening farishtang ularni quvsin. Ha, ular xuddi shamolda uchgan somonday boʻlsin.

⁶Qorongʻi, sirpanchiq boʻlsin ularning yoʻli, Ey Egam, Sening farishtang ularni quvsin.

⁷Sababsiz menga tuzoq qoʻydilar, Meni tutib olib oʻldirmoq uchun Sababsiz menga chuqur qazidilar.

⁸Toʻsatdan ularning boshiga halokat kelsin, Qoʻygan tuzogʻiga oʻzlari oʻralib qolsin, Qazigan chuqurga oʻzlari yiqilib, bitsin.

⁹Shunda, ey Egam, Sen tufayli shod boʻlaman, Najot berganing uchun quvonaman.

¹⁰Butun vujudim xitob qiladi: “Senga oʻxshashi yoʻq, ey Egam, Bechorani zoʻravondan qutqarasan, Faqirni talonchidan qutqarasan.”

¹¹Yovuz niyatli guvohlar paydo boʻladi, Bilmaydigan narsalarimni mendan soʻraydi.

¹²Ular yaxshiligimga yomonlik qaytaradi, Oʻzimni tamom yolgʻiz his qilaman.

¹³Ular xasta boʻlganlarida esa Men qanor kiyib, roʻza tutib, qaygʻu chekardim[63]. Boshimni quyi solib, ibodat qilardim[64].

¹⁴Doʻstim, birodarim, deya tashvish tortardim, Tuqqan onam uchun aza tutganday, Qaygʻudan boshimni egib yurardim.

¹⁵Qoqilganimda esa ular shod boʻldilar, Menga qarshi yigʻilishib keldilar, Bexabar ekanman, ular kallakesar ekan, Toʻxtovsiz menga boʻhton qildilar.

¹⁶Shakkoklarday ayovsiz masxara qildilar, Menga qarab tishlarini gʻijirlatdilar.

¹⁷Ey Egam, qachongacha qarab turasan? Qutqargin meni ularning hujumidan, Xalos qilgin jonimni oʻsha sherlardan!

¹⁸Buyuk jamoa ichra Senga shukur aytaman, Xalq yigʻinlarida Senga hamdlar oʻqiyman.

¹⁹Asossiz menga dushmanlik qilganlar Ustimdan kulmasinlar, Mendan sababsiz nafrat etganlar Koʻzlarini oʻynatmasinlar.

²⁰Tinchlik soʻzini ogʻizga olmas ular, Ammo yurtda tinch yashayotganlar ustidan Yolgʻon soʻzlarni oʻylab toparlar.

²¹Menga qarshi shangʻillab aytarlar ular: “Aha, koʻzlarimiz bilan koʻrdik qilmishlarini.”

²²Oʻzing koʻrgansan, ey Egam, sukut saqlama! Ey Rabbiy, mendan hech uzoqlashma!

²³Qani, boʻl, himoya qilgin meni, Men uchun jang qilgin, ey Xudoyim, Rabbim!

²⁴Sen odilsan, ey Egam Xudo, Shu bois meni oqlagin. Dushmanlarim aslo ustimdan kulmasin.

²⁵Ular oʻzlariga oʻzlari: “Aha, istaganimiz boʻldi — ku!” deb aytmasin. “Uni yutib yubordik — ku”, demasin.

²⁶Kulfatlarimdan zavqlanganlarning hammasi Sharmandayu sharmisor boʻlsin. Mendan oʻzlarini yuqori qoʻyganlar Sharmandalik, badnomlikka oʻralsin.

²⁷Men haq boʻlib chiqishimni istaganlar Xursand boʻlsin, sevinch ila kuylasin. Har doim aytaversin ular: “Qulining saodatidan huzurlangan Egamiz tobora yuksalaversin.”

²⁸Odilliging haqidagi soʻzlaru madhing Kun boʻyi tilimdan tushmaydi.