Read Uzbek Muqaddas Kitob Zabur 36 Bible Online

Zabur 36 - Uzbek Muqaddas Kitob bible

Zabur 36

¹Dovud sanosi. [65] Fosiqlarga gʻayirlik qilmagin, Badkirdorlarga hasad qilmagin.

²Ular maysaday tezda qurib qoladi, Yam — yashil oʻtday tezda soʻlib qoladi.

³Egamizga umid bogʻlab, yaxshilik qilgin, Shu yurtda yashab, halovat topgin.

⁴Egamizni oʻzingning shodliging deb bil, Koʻnglingdagi orzularingga U yetkazadi.

⁵Yoʻllaringni topshirgin Egamizga, Ishon Unga, U madad beradi.

⁶Solihligingni U tong kabi porlatadi, Haqligingni kunduzgi quyosh kabi qiladi.

⁷Sabrli boʻl, muntazir boʻl Egamizga, Gʻayirlik qilmagin yoʻllarini topganlarga, Fosiq niyatlarin amalga oshirganlarga.

⁸Gʻazabdan oʻzingni tiy, qahrdan qaytgin, Ich — etingni yema, bu faqatgina zararga olib boradi.

⁹Yovuzlar yoʻq qilib tashlanadi, Egamizdan umidvorlar yurtga egalik qiladi.

¹⁰Tez orada fosiqlarning kuni bitadi, Sen har qancha qidirmagin, Ularni bu yerdan topa olmaysan.

¹¹Beozorlar esa yurtga egalik qiladi, Moʻl baxt — saodatdan bahramand boʻladi.

¹²Fosiq solihlarga qarshi fitna qiladi, Ularga qarshi tishlarini gʻijirlatadi.

¹³Rabbiy fosiqlarni masxara qiladi, Ularning kuni bitayotir, buni Rabbiy biladi.

¹⁴Fosiq qilichini sugʻurib, kamonini tortadi, Bechora, mazlumni yiqitishga shaylanadi, Solihlarni oʻldirmoq istaydi.

¹⁵Ammo qilichlari oʻzlarining boshini yeydi, Kamonlari ham parcha — parcha boʻlib ketadi.

¹⁶Solihning qoʻlidagi oz narsa afzal, Jamiki fosiqning boyligidan koʻra.

¹⁷Fosiqning kuchi qirqilib ketadi, Solihni esa Egamiz qoʻllab — quvvatlaydi.

¹⁸Aybsizlarning ehtiyoji Egamiz e’tiborida, Ularning mulki to abad davom etadi.

¹⁹Qaro kunlarda ham ular zavol topmaydi, Qahatchilik kunlarda ham farovon yashaydi.

²⁰Fosiqlar esa albatta halok boʻladi, Egamiz gʻanimlari qirdagi gullarday quriydi, Ular tutun kabi tarqalib, yoʻq boʻlib ketadi.

²¹Fosiq qarz oladi — yu, qaytarib bermaydi, Solih esa himmat ila in’om qiladi.

²²Egamiz baraka bergan insonlar yurtni egallaydi, Egamiz la’natlagan odamlar esa yoʻq boʻlib ketadi.

²³Egamiz insonning yoʻlidan mamnun boʻlsa, Uning qadamlarini sobit qiladi.

²⁴Hatto qoqilsa ham yiqilib tushmaydi, Egamiz madad berib, qoʻlidan ushlaydi.

²⁵Men ham yosh edim, endi keksaydim, Solihlarning tark etilganini, Ularning zurriyoti non tilaganini koʻrmadim.

²⁶Ular doim himmat ila qarz beradi, Farzandlari ham baraka topadi.

²⁷Fosiqlikni tashla, yaxshilik qilgin, Toki yurtda to abad maskan qilgin.

²⁸Zotan, Egamiz yaxshi koʻradi adolatni, Tark etmaydi taqvodorlarni, Ularni to abad himoya qiladi, Fosiqlar naslini qirib tashlaydi.

²⁹Solih yurtga egalik qiladi, Bu yurtda to abad istiqomat qiladi.

³⁰Solihning ogʻzi donolikdan soʻzlaydi, Uning tili adolatni soʻylaydi.

³¹Yuragida Xudosining qonuni joy olgan, Shuning uchun qadamida adashmaydi.

³²Fosiq solihni doim kuzatadi, Uni oʻldirmoqni moʻljallab yuradi.

³³Egamiz solihni fosiqning ixtiyoriga topshirmaydi, Hukmga olib kelinganda, solih mahkum boʻlmaydi.

³⁴Egamizdan umid qil, Uning yoʻllarini tutgin, U seni yuksaltiradi, bu yurtni egallaysan, Fosiqning qirilib ketishini sen koʻrasan.

³⁵Koʻrganman fosiq, zolim odamning Oʻz yurtida yam — yashil daraxtday unganini.

³⁶Koʻp oʻtmay u oʻtib ketdi, yoʻq boʻldi, Qancha qidirsam ham, topa olmadim.

³⁷Aybsizga e’tibor ber, sofdilni kuzat, Tinchlikparvarning istiqboli yorqin.

³⁸Gunohkorlarning hammasi qirilib bitadi, Fosiqning kelajagi barham topadi.

³⁹Solih kishi Egamiz tufayli najot topgaydir, Kulfat chogʻi Egamiz solihning qal’asidir.

⁴⁰Egamizdan panoh topgani uchun Solihga Egamiz madad beradi, uni qutqaradi, Fosiqdan omon saqlaydi, unga najot beradi.