Read Uzbek Muqaddas Kitob Zabur 37 Bible Online

Zabur 37 - Uzbek Muqaddas Kitob bible

Zabur 37

¹Dovud sanosi. Egamizdan madad soʻrab aytgan iltijosi.

²Ey Egam! Gʻazab bilan menga tanbeh bermagin, Qahring sochib, menga jazo bermagin.

³Oʻqlaring menga sanchildi, Qoʻllaring ustimga bosib tushdi.

⁴Butun tanam xastadir gʻazabingdan, Sogʻligim yoʻqolgan gunohlarim dastidan.

⁵Ayblarim meni juda ham ezadi, Ular juda ogʻir yukka oʻxshaydi.

⁶Aqlsizligim[66] dastidan Yaralarim sasib, yiringlab oqyapti.

⁷Juda egilib, bukchayib qoldim, Kun boʻyi gʻamgin yuraman.

⁸Ichim isitmadan otash boʻlib yonmoqda, Tanamda bironta sogʻ joy yoʻq.

⁹Sillam qurib, tamom ezildim, Yurakdagi alamdan nola qilaman.

¹⁰Yuragim tubidagi istaklarim Ey Rabbiy, Oʻzingga ravshan, Ohu nolam Sendan yashirin emas.

¹¹Yuragim titraydi, quvvatim ketdi, Koʻzlarimning nuri adoyi tamom boʻldi.

¹²Doʻst — yoronlarim dardim tufayli oldimdan qochadi, Tugʻishganlarim aslo yonimga kelmaydi.

¹³Jonimga qasd qilganlar menga tuzoq qoʻyadi, Menga yomonlik istaganlar kulfatdan soʻz ochadi, Kun boʻyi yolgʻon soʻylab, fitna qiladi.

¹⁴Men esa karga oʻxshayman, eshitmayman, Soqovga oʻxshayman, gapira olmayman.

¹⁵Chindan ham men soqovga oʻxshayman, Tili qotib qolgan odamdayman.

¹⁶Ey Egam, umidim yolgʻiz Sensan, Ey Rabbim Xudo, javob beradigan Sensan.

¹⁷Ey Egam: “Holimni koʻrib, dushmanlarim shodlanmasin, Oyoqlarim qoqilganda, oʻzlarini katta tutmasin”, deya Senga ibodat qildim.

¹⁸Oʻzim ham yiqilay deb turibman, Tinmay azob chekayotirman.

¹⁹Qilgan egriliklarim uchun tavba qilaman, Gunohga qoʻl urganimdan pushaymonman.

²⁰Ashaddiy dushmanlarim koʻpdir, Sababsiz mendan nafrat etuvchilar son — sanoqsiz.

²¹Ular yaxshiligimga yomonlik ila javob beradi, Ezgu ishlarim uchun meni igʻvo qiladi.

²²Ey Egam, meni aslo tark etmagin, Ey Xudoyim, mendan uzoq ketmagin.

²³Menga yordam bergani shoshilgin, Ey mening najotkorim — Rabbiy!