Read Uzbek Muqaddas Kitob Zabur 38 Bible Online

Zabur 38 - Uzbek Muqaddas Kitob bible

Zabur 38

¹Ijrochilar rahbari Yodutunga[67]. Dovud sanosi.

²Oʻzimga oʻzim shunday deyman: “Yurar yoʻllarimni kuzatib boray, Gunoh soʻzdan tilimni tiyib yuray, Fosiqlar hamon oʻrab turarkan meni, Qulf urib yopib olay ogʻzimni.”

³Jim turdim, sukut saqladim, Soʻzlashdan boʻyin tovladim, Oshib boraverdi dardim.

⁴Qizib ketaverdi ichim, Oʻylaganim sari oʻrtandi koʻnglim, Oxiri tilimni tiya olmay yolvordim:

⁵“Ey Egam, umrim nihoyasini ayon qilgin, Qancha kunim qolganini ayon qilgin, Umrim qancha qisqaligini bilayin.

⁶Yelday oʻtib ketguvchi umr bergansan, Sening nazaringda umrim bir lahzadir, Har kimning umri bir nafasdir.

⁷Har kimning umri soyaday oʻtib ketar, Insonning harakati behuda boʻlar, Boylik yigʻar, lekin bilmas Kim boylikka egalik qilar.

⁸Kimdan men umid qilay endi, yo Rabbiy? Sendadir mening barcha umidim.

⁹Xalos qilgin meni gunohlarimdan, Kulmasin ahmoqlar mening ustimdan.

¹⁰Sukut saqlayman, ogʻzimni ochmayman, Axir, Sen Oʻzing meni shu ahvolga solding.

¹¹Mendan ofatlaringni uzoq qilgin, Sening zarbalaringdan oʻlay, dedim.

¹²Gunohlari uchun insonni jazolab, Unga tanbeh berasan. Kuya yeganday qadrli narsalarini yoʻq qilasan. Shubhasiz, inson bir nafasda oʻtib ketadi.

¹³Ey Egam, ibodatimni eshitgin, Nolayu faryodimga quloq solgin. Koʻz yoshlarimga befarq boʻlmagin. Axir, men Sening oʻtkinchi mehmoningman, Otalarim kabi musofirman.

¹⁴Qahrli nigohingni mendan oʻgirgin, Toki yana xursand boʻlayin Bu olamdan oʻtib yoʻq boʻlmasimdan oldin.”