Read Uzbek Muqaddas Kitob Zabur 39 Bible Online

Zabur 39 - Uzbek Muqaddas Kitob bible

Zabur 39

¹Ijrochilar rahbariga. Dovud sanosi.

²Men Egamizga umid bogʻladim, U menga yuz burdi, faryodimni eshitdi.

³Meni balchiq chuqurdan, Botqoqlikdan chiqarib oldi. Eson — omon meni qattiq yerga oʻtqazdi, Qadamlarimni dadil qildi.

⁴U ogʻzimga yangi bir qoʻshiq soldi, Bu qoʻshiq Xudoyimizga madhiyadir. Koʻplar Uning ishlarini koʻrib, qoʻrqadi, Egamizga umid bogʻlaydi.

⁵Baxtlidir Egamizga umid bogʻlaganlar, Kiborlarga suyanmaganlar, Butparastlardan yordam kutmaganlar.

⁶Koʻp moʻjizalar koʻrsatding, ey Egam Xudo, Bizga qaratilgan koʻp niyatlaringni bajarding. Biror zot Senga teng kela olmas, Ogʻiz ochib, moʻjizalaring haqida aytsam, Naqadar koʻpligini sanay olmasdim.

⁷Sen qurbonligu nazrni istamading, Kuydiriladigan qurbonlik hamda Gunoh qurbonligini[68] talab qilmading, Itoat qilishim uchun Sen quloqlarimni ochding[69].

⁸Shunda dedimki: “Mana, men keldim. Muqaddas bitiklarda men haqimda yozilgan[70].

⁹Sening xohishingni ado etishdan zavq olaman, Ey Xudoyim, Sening qonuning yuragim toʻridadir.”

¹⁰Ulugʻ jamoang ichra Najoting xushxabarini e’lon qilganman. Ha, ey Egam, Oʻzing bilasan, Ogʻzimga bir nafas ham dam bermaganman.

¹¹Qutqarganingni yuragimda yashirmadim, Sodiqliging, najotingdan har kimga soʻyladim, Sevging, sadoqatingni buyuk jamoangdan sir tutmadim.

¹²Ey Egam, mendan shafqatingni darigʻ tutmagin, Sening sevging, sadoqating meni to abad saqlasin.

¹³Behisob ofatlar atrofimni oʻradi, Gunohlarim oʻzimning boshimga yetdi, Endi koʻzlarim koʻra olmas, Gunohlarim boshimdagi sochimdan koʻpdir, Endi jasoratim tamoman soʻndi.

¹⁴Ey Egam, iltimos, menga najot ber, Kelgin tezda, ey Egam, menga madad ber.

¹⁵Jonimga qasd qilgan hammalar Sharmandayu sharmisor boʻlsin! Halokatimni istaganlar Uyatga qolib, orqaga qaytsin!

¹⁶“Holing qalay endi?!” deb meni masxaralaganlar Sharmanda boʻlganidan vahimaga tushsin.

¹⁷Senga yuz burganlarning hammasi Sen tufayli sevinch, shodlikka toʻlsin. Sening najotingni sevganlar: “Egamiz yuksalaversin”, deb doim aytsin.

¹⁸Men esa gʻarib, bechoraman, Ey Rabbiy, men haqimda oʻylagin, Madadkorim, najotkorim Oʻzingsan, Kechikmagin, ey Xudoyim!