Read Uzbek Muqaddas Kitob Zabur 43 Bible Online

Zabur 43 - Uzbek Muqaddas Kitob bible

Zabur 43

¹Ijrochilar rahbariga. Koʻrax naslining[76] qasidasi[77].

²Ey Xudo, oʻz quloqlarimiz ila eshitganmiz. Qadimda, ota — bobolarimiz davrida Qilgan ishlaringni ular bizga aytgan edi.

³Oʻz qoʻling ila quvding begona xalqlarni, Ularning yurtiga oʻtqazding otalarimizni. Kulfatga solding begona xalqlarni, Ozod qilding Sen otalarimizni[78].

⁴Ular yurtni qilich ila olmadilar, Oʻz qoʻllari bilan gʻalabaga erishmadilar. Ular Sening oʻng qoʻling, qudrating, Sening yuz nuring ila gʻolib boʻldilar. Zero, Sen ulardan mamnun boʻlganding.

⁵Sen Shohimsan, Xudoyimsan, Amr ber, Yoqub nasli gʻolib boʻlsin.

⁶Sen tufayli dushmanlarimizni yiqitamiz, Noming ila gʻanimlarimizni ezamiz.

⁷Ishonib qolmasman men oʻz yoyimga, Qilichim gʻalaba keltirmas menga.

⁸Gʻanimlarimiz ustidan bizni gʻolib qilding, Bizdan nafratlanganlarni sharmanda qilding.

⁹Ey Xudo, kun boʻyi Sen tufayli maqtandik, To abad Senga shukronalar aytamiz.

¹⁰Endi esa bizni rad qilib, sharmanda qilding, Lashkarlarimizni boshlab bormayapsan.

¹¹Bizni dushmanlarimiz oldida chekintirding, Gʻanimlarimiz bizni talon — taroj qildi.

¹²Bizni qoʻylar kabi yemishga berding, Xalqlar orasiga bizni yoyib yubording.

¹³Xalqingni qora chaqaga sotib yubording, Ularni sotishdan hech naf koʻrmading.

¹⁴Qoʻshni xalqlar bizni masxara qiladi, Sen yoʻl qoʻyib berding. Atrofimizdagilar bizni haqoratlaydi, Kulishlariga imkon berding.

¹⁵Xalqlar orasida kulgi qilding bizni, Xalqlar bizni masxaralab, chayqaydi boshini.

¹⁶Har doim xijolat boʻlib yuraman, Sharmandalik yuzimni qoplagan.

¹⁷Eshitganimiz masxarayu haqorat! Koʻrganimiz qasoskor dushman!

¹⁸Garchi Seni unutmagan boʻlsak — da, Garchi ahdingga xiyonat qilmasak — da, Bu koʻrgiliklar boshimizga tushdi.

¹⁹Biz Seni hech qachon tark etmadik, Sening yoʻllaringdan hech qachon toymadik.

²⁰Ammo chiyaboʻrilar makoniga bizni tashlading, Zimziyo zulmatga bizni uloqtirding.

²¹Ey Xudoyimiz, axir, Sening nomingni unutsak, Qoʻllarimizni begona xudolarga ochsak,

²²Ey Xudo, Sen buni bilmasmiding?! Axir, Sen yurakdagi sirlarni bilasan — ku!

²³Sen tufayli har kuni oʻlimga duch kelamiz, Boʻgʻizlanadigan qoʻyday boʻlib qolganmiz.

²⁴Tursang — chi, nega uxlayotgandaysan, yo Rabbiy?! Qani, boʻl, bizni to abad rad etmagin.

²⁵Nega bizdan yuz oʻgirasan?! Boshimizga tushgan kulfatu zulmni unutasan?!

²⁶Biz agʻnatilganmiz tuproqqa, Tanamiz yopishib qolgandir yerga.

²⁷Qani, kel, bizga madad ber, Sodiq sevging haqi bizni qutqar.