Read Uzbek Muqaddas Kitob Zabur 44 Bible Online

Zabur 44 - Uzbek Muqaddas Kitob bible

Zabur 44

¹Ijrochilar rahbariga. “Nilufar” kuyiga aytiladigan toʻy qoʻshigʻi. Koʻrax naslining[79] qasidasi[80].

²Shohimga she’rlarimni bagʻishlayman, Yuragimdan goʻzal soʻzlar toʻkiladi, Tilim mohir kotib qalamiga oʻxshaydi.

³Ey shohim! Insonlar orasida juda chiroylisan. Xudo senga to abad baraka bergani uchun Lablaringdan latif soʻzlar yogʻiladi.

⁴Ey qudratli shoh, belingga bogʻla qilichingni, Hashamatu ulugʻvorliging bilan zohir boʻlgin.

⁵Ulugʻvorlik bilan olgʻa bos! Haqiqat, kamtarlik, adolat uchun gʻalaba qil! Oʻng qoʻling qoʻrqinchli ishlar koʻrsatsin.

⁶Gʻanimlaringning yuragini Oʻtkir oʻqlaring teshib oʻtadi. Xalqlar oyogʻing ostiga yiqiladi.

⁷Xudo bergan taxting[81] abadiydir, Adolat hassasi shohliging hassasidir.

⁸Sen solihlikni sevasan, qabihlikdan nafratlanasan. Shu bois Xudo seni doʻstlaringdan ustun qildi, Ha, Xudoying shodlik moyini senga surtdi.

⁹Libosingdan mirra[82], aloe va dolchinning Xushboʻy hidlari ufurar. Fil suyagi bilan bezatilgan saroylarda Cholgʻu navolari seni shod qilar.

¹⁰Shoh qizlari izzatli xonimlaring orasidadir, Ofir[83] oltiniga bezangan malika oʻng qoʻlingda oʻtirar.

¹¹Tingla, ey qiz, quloq solib, oʻylagin, Xalqing, otang xonadonin unutgin.

¹²Jamolingga shoh maftun boʻlgandir, Ta’zim qil unga, u xoʻjayiningdir.

¹³Tir[84] xalqi hadyalar olib keladi, Boylar sendan marhamat istaydi.

¹⁴Saroyda malika naqadar goʻzal! Liboslari oltin bilan bezatilgan.

¹⁵Naqshli libosida uni shoh huzuriga olib kelishadi, Ortidan qizlar, uning dugonalari ergashib keladi.

¹⁶Ular shod — xurramlik ichra keladi, Shohning saroyiga ular kirib keladi.

¹⁷Ey shohim, oʻgʻillaring olgaylar otalaring oʻrnini, Butun yurtda shahzodalar qilgaysan sen ularni.

¹⁸Qoʻshigʻim tufayli noming nasllar osha yashar, Shu bois xalqlar seni to abad madh etarlar.