Read Uzbek Muqaddas Kitob Zabur 45 Bible Online

Zabur 45 - Uzbek Muqaddas Kitob bible

Zabur 45

¹Ijrochilar rahbariga. “Qizlar” kuyiga aytiladigan Koʻrax naslining[85] qoʻshigʻi.

²Xudo bizning panohimiz, qudratimizdir, Kulfatda qolganimizda doim madadkorimizdir.

³Shu bois biz qoʻrqmaymiz hech ham Yer ostin — ustin boʻlib ketsa ham, Dengiz bagʻriga togʻlar qulab tushsa ham.

⁴Dengizlar oʻkirib, toshib ketsa ham, Shiddatli toʻlqinlar togʻlarni titratsa ham Biz qoʻrqmaymiz hech ham.

⁵Bir daryo bor, uning suvlari Shodlik olib kelar Xudo shahriga[86], Xudoyi Taoloning muqaddas makoniga.

⁶Shaharda Xudo turgani uchun Shahar qulamas aslo, Tong otganda, Xudo yordamga keladi.

⁷Xalqlar algʻov — dalgʻov boʻladi, Shohliklar qulaydi. Xudoning ovozi guldiraydi, yer erib ketadi.

⁸Sarvari Olam biz bilandir, Yoqubning Xudosi qal’amizdir.

⁹Keling, Egamizning ishlarini koʻring, Yer yuziga keltirgan kulfatni koʻring.

¹⁰Butun olamda U jangni toʻxtatadi, Yoyni parchalaydi, nayzani sindiradi, Qalqonlarni[87] olovda yoqib, shunday deydi:

¹¹“Toʻxtang, biling, Men Xudoman, Xalqlar orasida Men yuksalgayman, Yer yuzida Men yuksalgayman.”

¹²Sarvari Olam biz bilandir, Yoqubning Xudosi qal’amizdir.