Read Uzbek Muqaddas Kitob Zabur 47 Bible Online

Zabur 47 - Uzbek Muqaddas Kitob bible

Zabur 47

¹Koʻrax naslining[90] sanosi. Qoʻshiq.

²Egamiz buyukdir! Egamiz Oʻz shahrida, Ha, Oʻzining muqaddas togʻida[91] Madhiyalarga loyiqdir!

³Xudoning muqaddas togʻi yuksak va goʻzaldir, Butun yer yuziga shodlik olib keladir! Buyuk Shohning shahridagi, Uning shimolidagi[92] Sion togʻi![93]

⁴Xudo Quddusning qoʻrgʻoni ichida turadi, Uning qal’asi boʻlib, Oʻzini namoyon etgan.

⁵Shohlar toʻplandilar, Birgalashib Sion togʻiga qarshi yurdilar.

⁶Uni koʻrdilar — u, shoshib qoldilar, Vahimaga tushib, qochib qoldilar.

⁷Tugʻayotgan xotin tortganday dard Oʻsha yerda ularni titroq bosdi.

⁸Sharqdan shamol esib, Tarshish[94] kemalarini parchalaganday, Sen ularni qirib tashlading.

⁹Xudo nima qilganini biz eshitdik. Nima eshitgan boʻlsak, endi oʻshani Xudoyimiz, Sarvari Olamning shahrida koʻrdik. Bu shaharni Xudo to abad saqlar.

¹⁰Ey Xudo, Ma’bading ichida Sodiq sevging haqida oʻylaymiz.

¹¹Ey Xudo, madhing ham dongʻing kabi, Yerning toʻrt tomoniga yoyilgan, Oʻng qoʻling adolat ila toʻlib — toshgan.

¹²Sening hukmlaringdan Sion togʻi shod boʻlsin, Yahudo shaharlari sevinsin!

¹³Ey Isroil xalqi, Quddus[95] tevaragida yuring. Atrofida aylanib, Uning minoralarini sanab chiqing.

¹⁴Sionning istehkomlariga e’tibor bering, Uning qoʻrgʻonlariga qarang! Bularni koʻrib, kelgusi avlodlarga hikoya qiling:

¹⁵“Xudo oʻsha istehkomlarga oʻxshaydi. U to abad bizning Xudoyimizdir, U to abad bizning yoʻlboshchimiz boʻladi.”