Read Uzbek Muqaddas Kitob Zabur 48 Bible Online

Zabur 48 - Uzbek Muqaddas Kitob bible

Zabur 48

¹Ijrochilar rahbariga. Koʻrax naslining[96] sanosi.

²Eshitinglar, ey xalqlar, Quloq soling, olam ahli,

³Ey insonlar, jamiki odamzod, Boylaru faqirlar, quloq solingiz!

⁴Ogʻzimdan toʻkiladi dono soʻzlar, Qalbimning mulohazalari ham idroklidir.

⁵Qulogʻimni hikmatga buraman, Ma’nosini lira bilan anglataman.

⁶Nega qoʻrqishim kerak qaro kunlarda?! Nega qoʻrqishim kerak ta’qib qiluvchilar Qabih ishlari bilan meni oʻrab olganlarida?!

⁷Ular mol — mulkiga ishonadilar, Behisob boyliklari ila maqtanadilar.

⁸Axir, hech kim hayotini[97] pul toʻlab qutqara olmas, Yoki uning uchun Xudoga toʻlov berolmas.

⁹Inson hayoti uchun toʻlov gʻoyat qimmatdir, Hech qanday toʻlov yetarli boʻlmas.

¹⁰Yoʻqsa inson to abad yashardi, Qabr yuzini aslo koʻrmasdi.

¹¹Dononi qarang, ular ham oʻladi, Ahmoq, bema’ni birday halok boʻladi, Ularning boyligi boshqalarga qoladi.

¹²Yurtlarga oʻzlarining nomini berganda ham, Mozor to abad uyi boʻlib qoladi, Maskani nasldan naslga oʻtaveradi[98].

¹³Boyligiga qaramay inson to abad qolmas, Oʻladigan jonzotga oʻxshaydi ular.

¹⁴Oʻzlariga ishonganlarning qismati shudir, Ularning soʻzini ma’qullaganlarning taqdiri shudir:

¹⁵Ular qoʻylar kabi oʻliklar diyoriga haydaladilar, Oʻlim ularning choʻponi boʻladi, Tongda toʻgʻri insonlar ularning ustidan hukmron boʻladi, Tanalari chirib ketadi, Oʻliklar diyori[99] ularning qasri boʻladi.

¹⁶Oʻliklar diyori hukmidan Xudo meni qutqaradi, Shubhasiz, U meni Oʻz yoniga oladi.

¹⁷Birontasi boyib ketganda, Uyining hashamati oshib ketganda, Vahimaga tushma!

¹⁸Olamdan oʻtganda, u oʻzi bilan hech narsa olib ketmaydi, Boyligi ham uning ortidan qabrga ergashib bormaydi.

¹⁹Hayotligida oʻzini baxtiyor hisoblaydi, Oshib — toshib yashagani uchun Koʻplar unga hamdu sano aytadi.

²⁰U ham ota — bobolari yoniga ketadi, Ular kabi yorugʻlikni boshqa koʻrmaydi.

²¹Boyligi boʻla turib aqlsiz boʻlganlar Oʻladigan jonzotga oʻxshaydilar.