Read Uzbek Muqaddas Kitob Zabur 49 Bible Online

Zabur 49 - Uzbek Muqaddas Kitob bible

Zabur 49

¹Osif[100] sanosi. Xudolar Xudosi — Egamiz Soʻylar, da’vat qilar yer yuziga Sharqdan gʻarbga qadar.

²Xudo Oʻz nurini sochar Quddusdan[101] — Goʻzallikda komil shahardan.

³Xudoyimiz kelar, sukut saqlamas, Uning oldida alanga yamlab yuborar, Atrofida boʻron gʻazabdan quturar.

⁴Oʻz xalqini hukm etmoq uchun Yeru osmonni guvoh qilib chaqirar:

⁵“Yigʻib keling Mening taqvodor xalqimni, Qurbonlik orqali Men bilan ahd qilganlarni!”

⁶Samolar e’lon qilar Xudoning odilligini, Hakam Xudoning Oʻzidir.

⁷Xudo aytar: “Eshit, ey xalqim, Men soʻzlayman, Ey Isroil, senga qarshi guvohlik beraman, Men Xudoman, sening Xudoyingman.

⁸Keltirgan qurbonliklaring doimo oldimda. Kuydirilgan qurbonliklaringdan shikoyat qilmayman.

⁹Ogʻilingdagi buqangga muhtoj emasman, Suruvingdagi echkingga ham zor emasman.

¹⁰Menikidir oʻrmondagi jamiki hayvon, Minglab qirlardagi molu qoʻylar.

¹¹Menikidir jamiki togʻdagi qushlar, Menikidir daladagi barcha jonivorlar.

¹²Och qolsam ham, sendan ovqat soʻramasdim. Axir, Menikidir olam, undagi hamma narsa.

¹³Men buqa goʻshtini yeymanmi?! Yoki echki qonini ichamanmi?!

¹⁴Men, Xudoga shukrona qurbonligini qil, Men, Xudoyi Taologa ontingni ado qil.

¹⁵Ogʻir kunda Menga iltijo qilgin, Senga najot beraman, Sen esa Menga maqtov aytasan.”

¹⁶Fosiqqa esa Xudo shunday deydi: “Ne haqing bor qonunlarimni tilga olmoqqa?! Ne haqing bor ahdimni ogʻzingga olmoqqa?!

¹⁷Nafrat ila qaraysan — ku yoʻl — yoʻriqlarimga, Otib tashlaysan — ku kalomlarimni orqangga!

¹⁸Oʻgʻrini koʻrganingda, doʻstlashasan u bilan, Sherik boʻlib olasan zinokorlar bilan.

¹⁹Ogʻzing yomon soʻzlar uchun doim tayyordir, Tilingning toʻqigani faqat yolgʻondir.

²⁰Oʻtirib, birodaringga qarshi soʻylaysan, Tugʻishganingga ham tuhmat qilasan.

²¹Shu ishlarni qilganingda, sukut saqladim, Meni ham oʻzingga oʻxshagan, deb oʻylading. Endi — chi, aybingni boʻyningga qoʻyib, Seni hukm qilaman.

²²Ey Meni unutganlar, bilib qoʻying, Yoʻqsa sizlarni parcha — parcha qilaman, Bironta najot berguvchi topilmaydi.

²³Menga shukrona qurbonligi keltirganlar Meni izzat qilgan boʻladi. Men Oʻz najotimni Toʻgʻri yoʻldan yurganlarga koʻrsataman.”