Read Uzbek Muqaddas Kitob Zabur 5 Bible Online

Zabur 5 - Uzbek Muqaddas Kitob bible

Zabur 5

¹Ijrochilar rahbariga. Nay joʻrligida aytiladigan Dovud sanosi.

²Soʻzlarimga quloq tut, ey Egam! Diqqat qilgin nolalarimga.

³Eshitgin, madad soʻrab iltijo etaman, Sen ham Shohimsan, ham Xudoyimsan! Shu bois Senga ibodat qilaman.

⁴Ey Egam! Tong chogʻi ovozimni eshitasan, Subhidamda Senga yolvoraman, Sendan javob kutaman.

⁵Qabihlikdan mamnun boʻlmaydigan Xudosan Sen, Senga mehmon boʻlolmas gunohkor inson.

⁶Takabburlar huzuringda tura olmaydilar, Hamma badkirdorlarni Sen yomon koʻrasan.

⁷Yolgʻon gapiradiganlarni Sen qirib tashlaysan, Ey Egam, qonxoʻr, yolgʻonchilardan Sen jirkanasan.

⁸Men esa sodiq sevgingning moʻlligi sabab Sening uyingga kiraman. Muqaddas Ma’badingda ta’zim qilaman, Qoʻrquv ila Senga sajda qilaman.

⁹Naqadar dushmanlarim koʻp, ey Egam, Odilliging bilan meni soʻqmogʻingdan yetakla, Oʻz yoʻllaringni menga ravshan qil.

¹⁰Dushmanlarim ogʻzidan haqiqat chiqmaydi, Ularning yuraklari baloyu ofatdir. Ochiq qabr kabidir ogʻizlari, Tillari xushomad qiladi.

¹¹Ey Xudo, ularni jazolagin! Yomon niyatlari oʻzlarining boshiga yetsin. Ular Senga qarshi isyon qilganlar. Gunohlari koʻpligi uchun ularni haydab yuborgin.

¹²Senda panoh topganlarning hammasi sevinsin, To abad shodlikdan ular kuylasin. Ularni Sen himoya qilganing uchun, Seni sevganlar sevinch ila joʻshsin.

¹³Ey Egam! Sen solih kishilarga baraka berasan, Sening himmating ularni qalqonday himoya qiladi.