Read Uzbek Muqaddas Kitob Zabur 50 Bible Online

Zabur 50 - Uzbek Muqaddas Kitob bible

Zabur 50

¹Ijrochilar rahbariga. Natan paygʻambar kelib, Dovudning Botsheva bilan qilgan gunohini fosh etgandan keyin[102], Dovudning aytgan sanosi.

³Rahm qilgin menga, ey Xudo, Sodiq sevging, cheksiz shafqating ila Itoatsizligimni olib tashlagin.

⁴Yuvib tashla barcha ayblarimni, Poklagin gunohlarimdan.

⁵Ha, oʻzimning itoatsizligimni bilaman, Gunohim turar koʻz oʻngimda mudom.

⁶Senga, yolgʻiz Senga qarshi gunoh qilganman, Sening oldingda qabihliklarga qoʻl urganman, Shu bois hukm qilganingda Sen barhaqsan, Aybimni fosh etganingda doimo toʻgʻri boʻlib chiqasan.

⁷Mana, gunohkor boʻlib tugʻilganman, Onam qornidayoq gunohkor edim.

⁸Biroq Sen samimiy, pok qalbni istaysan, Asl donolikni Oʻzing menga oʻrgatgin[103].

⁹Pokla meni issop oʻti[104] ila, toza boʻlayin, Yuvgin meni, qordan ham oq boʻlayin.

¹⁰Yana eshitay shodlik, quvonch xabarin, Sen ezgan suyaklarim yana quvonsin.

¹¹Gunohlarimdan chetga ol koʻzlaringni, Olib tashla ayblarimni.

¹²Ey Xudo, menda toza yurak yaratgin, Sodiq qalbni menga yana bir bor bergin.

¹³Huzuringdan meni uloqtirib tashlama, Muqaddas Ruhingni mendan olma.

¹⁴Najoting shodligini menga qaytargin, Itoat etishga menda istak uygʻotgin.

¹⁵Shunda itoatsizlarga Sening yoʻllaringni oʻrgataman, Gunohkorlar qaytib keladilar Senga.

¹⁶Qon toʻkkanim uchun kechir meni, ey Xudo, Najot berganingni sevinch ila kuylar tilim, Ey najotkorim Xudo!

¹⁷Lablarimni ochgin, ey Rabbiy, Ogʻzim Seni madh aylasin.

¹⁸Qurbonlikni Sen xohlamaysan, Qurbonlik kuydirganimda ham Sen xush koʻrmagan boʻlarding.

¹⁹Senga ma’qul qurbonligim ezilgan ruhdir, Ezilgan, tavba qilgan yurakni Sen rad etmaysan, ey Xudo.

²⁰Lutfu karaming bilan Quddusni yashnatgin, Sion shahri devorlarini qaytadan qurgin.

²¹Shunda munosib qurbonliklar keltiriladi, Kuydiriladigan qurbonliklar Seni mamnun qiladi, Qurbongohingda buqalar nazr qilinadi.