Read Uzbek Muqaddas Kitob Zabur 54 Bible Online

Zabur 54 - Uzbek Muqaddas Kitob bible

Zabur 54

¹Ijrochilar rahbariga. Torli asboblar joʻrligida aytiladigan Dovud qasidasi[112].

²Ibodatimga quloq sol, ey Xudo, Iltijoimni e’tiborsiz qoldirma.

³Eshit meni, javob ber, Dushmanlarim dagʻdagʻasi, fosiqlarning siquvi Boshimga gʻam — kulfat keltiradi. Ular gʻazablanib, mendan nafratlanadi. Eh, oʻylarim qiynaydi meni, Gʻam — tashvishlar qattiq ezadi.

⁵Yuragim hasratga toʻladir, Oʻlim vahimasi meni bosib keladir.

⁶Qoʻrquv, titroq menga kelmoqda, Dahshat meni ezib bormoqda.

⁷“Qaniydi kaptar kabi, qanotim boʻlsa”, dedim, “Uchib ketib, orom olgan boʻlardim.

⁸Haqiqatan, uzoqlarga uchib qutulardim, Sahroda makon qilgan boʻlardim.

⁹Quturgan shamolu boʻrondan qochib, Oʻzimga boshpana topgani shoshilgan boʻlardim.”

¹⁰Ey Rabbiy, dushmanlarimni chalgʻit, Ularning gaplarini chalkashtir. Shaharda zoʻravonlik, janjalni koʻrib turibman.

¹¹Fosiqlar kecha — kunduz shahar devori ustida izgʻiydi, Yovuzlik, vahima shahar ichida yuz bermoqda.

¹²Shaharning oʻrtasida buzgʻunchilik, Koʻchalaridan zulm va hiyla arimaydi.

¹³Gʻanimlarim meni haqorat qilganda edi, Bunga bardoshim yetgan boʻlardi. Dushmanim oʻzini mendan yuqori qoʻyganda edi, Undan yashiringan boʻlardim.

¹⁴Ammo u mening tengim — ku, Yaqin doʻstim hamda hamrohim — ku.

¹⁵U bilan dilkash doʻst edik, Ey Xudo, Sening uyingdagi yigʻinda birga yurardik.

¹⁶Uylari, yuraklari fosiqlikka toʻla boʻlgani uchun Gʻanimlarim oʻlimga roʻbaroʻ boʻlsin, Tiriklayin oʻliklar diyoriga[113] tushsin.

¹⁷Men iltijo qilaman Xudoga, Najot beradi Egam menga.

¹⁸Oqshom, sahar hamda kunduz Dardu figʻonlarimni aytaman. Egam mening ovozimni eshitadi.

¹⁹Garchi menga qarshilar koʻp boʻlsa ham, Birorta ham zarar yetkazmay Meni janglardan qutqaradi.

²⁰Azaldan taxtda oʻtirgan Xudo Menga quloq tutib, Dushmanlarimni magʻlub qiladi. Axir, ular oʻz yoʻlidan qaytmadilar, Xudodan ular qoʻrqmadilar.

²¹Hamrohim oʻz doʻstiga qarshi qoʻlini koʻtardi, Men bilan qilgan ahdiga u xiyonat qildi.

²²Uning ogʻzidan bol tomadi, Yuragi esa adovatga toʻla. Soʻzlari moydan ham yoqimli, Aslida qindan chiqqan qilichdaydir.

²³Tashvishlaringni Egamizga topshirgin, U senga tayanch boʻladi. Egamiz hech qachon solihning yiqilishiga yoʻl qoʻymaydi.

²⁴Ey Xudo, fosiqlarni Sen Oʻliklar diyoriga uloqtirasan. Qonxoʻr, xoin kimsalar aslo Umrining yarmisini ham yashamaydi. Men esa Senga umid bogʻlayman.