Read Uzbek Muqaddas Kitob Zabur 57 Bible Online

Zabur 57 - Uzbek Muqaddas Kitob bible

Zabur 57

¹Ijrochilar rahbariga. “Xarob etma” kuyiga aytiladigan Dovud qoʻshigʻi.

²Ey hukmdorlar! Nahot siz adolatli qaror chiqarasiz?! Nahot sizlar toʻgʻrilik ila xalqlarni hukm qilasiz?!

³Yoʻq, axir, yuraklaringiz adolatsizlikka toʻla — ku! Yer yuzida qoʻllaringiz zoʻravonlikni taqsimlaydi — ku!

⁴Fosiqlar onasining qornidayoq adashadi, Yolgʻonchilar tugʻilishdanoq yoʻldan ozadi.

⁵Ularning zahri ilonning zahriga oʻxshaydi. Kar ilonday quloq solishni ular istamaydi.

⁶Ilon oʻynatuvchining kuyini ular eshitmaydi, Uning mahorat bilan chalgan kuyiga beparvo.

⁷Sindir ularning tishlarini, ey Xudo, Sugʻurib ol sherlarning qoziq tishlarini, ey Egam!

⁸Ular oqar suvday yoʻq boʻlib ketsin, Ularning oʻqlari nishonga tegmaydigan boʻlsin.

⁹Balchiqqa botib ketgan shilliq qurtday boʻlsin, Onasi qornidan oʻlik tugʻilib, Hech qachon quyosh koʻrmagan chaqaloqday boʻlsin.

¹⁰Yonayotgan tikan qozonni tez qizdirganday Fosiqni shunchalik tez supurib yoʻq qilgin.

¹¹Fosiqdan oʻch olinganda, solih sevinadi, Ularning qonida solih oyoqlarini yuvadi.

¹²Odamlar aytar: “Shubhasiz, solihga mukofot bordir, Yer yuzida hukm qiluvchi Xudo albatta bordir.”