Read Uzbek Muqaddas Kitob Zabur 58 Bible Online

Zabur 58 - Uzbek Muqaddas Kitob bible

Zabur 58

¹Ijrochilar rahbariga. Shoul Dovudni oʻldirish uchun uning uyini kuzatishga kishi yuborgandan keyin[119], Dovudning aytgan qoʻshigʻi. “Xarob etma” kuyiga aytiladi.

²Gʻanimlarimdan meni qutqar, ey Xudoyim, Menga qarshi turganlardan himoya qil meni.

³Badkirdorlardan qutqargin meni, Qonxoʻrlardan saqlagin meni.

⁴Qara, ular meni poylab yotarlar, Zolimlar menga qarshi fitna qilarlar, Garchi aybu gunohim boʻlmasa — da, ey Egam,

⁵Garchi men haqsizlik qilmasam — da, Ular menga qarshi hujum qilmoqqa tayyor. Qoʻzgʻal Oʻzing, ahvolimni koʻr, kel yordamga.

⁶Ey Isroil xalqining Xudosi, Ey Parvardigori Olam — Egam, Qani, boʻl, barcha xalqlarni jazolagin, Yovuz sotqinlarga shafqat qilmagin.

⁷Gʻanimlarim har kuni oqshomda qaytib keladi, Itlarday uvullab, shahar izgʻiydi.

⁸Qara, ogʻizlaridan qusuq chiqadi, Tillaridan zahar soʻzlar chiqadi, “Kim ham bizni eshitardi”, deya oʻylaydi.

⁹Ular ustidan Sen kulasan, ey Egam, Hamma xalqlarni Sen masxaralaysan.

¹⁰Senga intizorman, ey Qudratim, Sen mening qal’amsan, ey Xudo!

¹¹Sodiq sevging ila, ey Xudoyim, menga madad berasan, Koʻzlarimga dushmanlarim magʻlubiyatini koʻrsatasan.

¹²Ularni oʻldirma, xalqim bu saboqni unutib qoʻyar, Qudrating bilan ularni titrat, Ey qalqonim Rabbiy, ularni koʻtarib ur.

¹³Ularning ogʻzidan chiqqan gunohlar uchun, Lablaridan chiqqan soʻzlar uchun Oʻzlarining takabburligi orqali ilinsin. Ular aytadigan la’nat, yolgʻon uchun

¹⁴Gʻazabing ila ularni yoʻq qilgin, Bitta ham qoldirmay qirib tashlagin. Shunda ey Xudo, Yoqub nasli ustidan hukmron ekanliging Yerning toʻrt tomonida ma’lum boʻladi.

¹⁵Gʻanimlarim har kuni oqshomda qaytib keladi, Itlarday uvullab, shahar izgʻiydi.

¹⁶Ovqat izlab, daydib yuradi, Agar toʻymasalar, irillaydi.

¹⁷Men esa Sening qudratingni tarannum etaman, Sodiq sevgingni tongda sevinch ila kuylayman. Sen mening qal’am boʻlgansan, Kulfatda qolganimda panohimsan.

¹⁸Ey Qudratim, Seni kuylab madh qilaman, Sen, ey Xudo, mening qal’amsan, Sodiq sevgisini koʻrsatuvchi Xudosan.