Read Uzbek Muqaddas Kitob Zabur 59 Bible Online

Zabur 59 - Uzbek Muqaddas Kitob bible

Zabur 59

¹Ijrochilar rahbariga. Dovud Oram — Naxrayim[120] va Oram — Zoʻvo[121] xalqi bilan urush qilayotgan paytda[122] Yoʻab qaytib kelib, oʻn ikki ming Edomlikni Tuz vodiysida[123] oʻldirgandan keyin, Dovudning aytgan qoʻshigʻi. “Nilufar gul shahodati” kuyiga aytiladi. Ta’lim uchun.

³Ey Xudo, bizni tark etding, Mudofaamizni yorib oʻtding, Bizdan gʻazablanding, Endi bizni oldingi holimizga qaytargin!

⁴Yerni silkitding, yoriqlar ochding, Yoriqlarni tuzatgin, yer tebranmoqda.

⁵Xalqingga koʻp azoblar berding, Gandiraklab yursin deb, ichgani sharob[124] berding.

⁶Ular kamon oʻqlaridan yashirinib olsin deya[125], Oʻzingdan qoʻrqqanlarga ishora berib, bayroq koʻrsatasan.

⁷Oʻng qoʻling ila gʻalaba ato qilgin, Iltijoimizga javob bergin[126], Suyukli bandalaring najot topsin.

⁸Ey Xudo, Oʻz muqaddas makoningdan va’da bergansan[127]: “Shodlanib, Shakamni[128] boʻlib tashlayman, Suxot vodiysini[129] taqsimlab beraman.

⁹Gilad Menikidir, Manashe[130] Menikidir, Efrayim dubulgʻamdir, Yahudo[131] saltanat hassamdir.

¹⁰Moʻab Mening qoʻlyuvgichimdir, Edom uzra chorigʻimni otaman[132], Olqishlang Meni, ey Filistlar![133]”

¹¹Ey Xudo, qaniydi mustahkam shaharga[134] meni olib borsalar, Edomga meni boshlab borsalar.

¹²Axir, bizni Oʻzing rad etding — ku! Lashkarimizga yoʻlboshchilik qilmayapsan — ku endi!

¹³Dushmandan qutqarib, bizga yordam ber, Insonning yordami butunlay behuda.

¹⁴Ey Xudo, Sen bilan biz gʻolib boʻlamiz, Dushmanlarimizni Sen yanchib tashlaysan.