Read Uzbek Muqaddas Kitob Zabur 65 Bible Online

Zabur 65 - Uzbek Muqaddas Kitob bible

Zabur 65

¹Ijrochilar rahbariga. Sano. Qoʻshiq. Xudoga shodlik ila hayqiring, Ey yer yuzidagi insonlar!

²Xudoning ulugʻvorligini kuylang! Unga ajoyib hamdu sanolar ayting!

³Xudoga aytinglar: “Sening ishlaring naqadar gʻaroyib! Qudrating buyukligidan Dushmanlaring oldingda titrab tiz choʻkadi.

⁴Butun zamin Senga sajda qiladi, Ular Senga hamdu sano aytadi, Ha, Oʻzingga hamdu sano kuylaydi.”

⁵Kel! Xudo nima qilganini koʻrgin! Inson manfaati uchun qilgan Gʻaroyib ishlarini koʻrgin!

⁶Xudo dengizni quruq yerga aylantirdi, Ota — bobolarimiz bahrdan yurib oʻtdi[140], U yerda qilgan ishlaridan, Xudo tufayli biz sevinamiz.

⁷Qudrati ila to abad hukm suradi, Koʻzlari xalqlarni kuzatib turadi, Unga qarshi isyonchilar qoʻzgʻalmasin.

⁸Ey xalqlar, Xudoyimizga olqishlar ayting, Uning hamdu sanosi yangrasin.

⁹U bizning hayotimizni saqlagan, Oyoqlarimizni toyib ketishdan asragan.

¹⁰Ey Xudo, Sen bizni sinading, Kumushni tozalaganday bizni tozalading.

¹¹Bizni tuzoqqa yoʻliqtirding, Yelkamizga ogʻir yuk ortding.

¹²Aravalarni boshimiz uzra yurgizding, Olov, suvlardan biz kechib oʻtdik, Farovonlikka[141] bizni olib kelding.

¹³Kuydiriladigan qurbonliklar bilan Senga bergan ontimni ado etgani Men Sening uyingga kelaman.

¹⁴Kulfatda qolganimda ont ichgan edim, Tilim va’da bergan, ogʻzim soʻylagan edi.

¹⁵Boʻrdoqilarni kuydirib, Senga qurbonlik qilaman. Qoʻchqor, taka, buqalarni keltiraman. Qurbonliklarning hidi samoga yetib boradi.

¹⁶Ey Xudodan qoʻrqqanlar, kelib eshitinglar, Men uchun U nima qilganin soʻzlab berayin.

¹⁷Madad soʻrab Xudoga yolvordim, Uning hamdu sanosi hech tilimdan tushmadi.

¹⁸Yuragimda gunohim boʻlsa edi, Meni aslo eshitmas edi Rabbiy.

¹⁹Xudo meni tingladi, Ibodat qilganimda, ovozimni eshitdi.

²⁰Xudoga olqishlar boʻlsin! Ibodatimni U rad qilmadi, Sodiq sevgisini mendan darigʻ tutmadi.