Read Uzbek Muqaddas Kitob Zabur 66 Bible Online

Zabur 66 - Uzbek Muqaddas Kitob bible

Zabur 66

¹Ijrochilar rahbariga. Torli asboblar joʻrligida aytiladigan sano. Qoʻshiq.

²Ey Xudo, mehribon boʻlgin, baraka bergin bizga, Yuzing nurini sochgin lutf ila ustimizga,

³Zaminda ma’lum boʻladi Sening yoʻllaring, Jamiki xalqlar orasida ma’lum boʻladi Sening najoting.

⁴Ey Xudo, xalqlar Seni madh qilsin, Jamiki xalqlar Senga hamdu sano aytsin.

⁵Xalqlarni Sen odillik ila hukm qilasan, Zamin uzra elatlarga yoʻlboshchilik qilasan, Sevinsin xalqlar, shodlanib qoʻshiq aytsin.

⁶Ey Xudo, xalqlar Seni madh qilsin, Jamiki xalqlar Senga hamdu sano aytsin.

⁷Yer oʻz hosilini bersin, Xudoyimizning Oʻzi bizga baraka bersin.

⁸Ha, Xudo bizga baraka bersin! Yerning toʻrt tomonidagi xalqlar Unga tiz choʻksin.