Read Uzbek Muqaddas Kitob Zabur 67 Bible Online

Zabur 67 - Uzbek Muqaddas Kitob bible

Zabur 67

¹Ijrochilar rahbariga. Dovud sanosi. Qoʻshiq.

²Qoʻzgʻalsin Xudo, tarqalib ketsin dushmanlari, Oldidan qochib ketsin Undan nafratlanganlar.

³Tutunni shamol tarqatgani kabi, Xudo ularni haydab yuborsin. Mum olovda erigani kabi, Xudo oldida fosiq halok boʻlsin.

⁴Solihlar esa xursand boʻlsin, Xudo oldida shod boʻlsin, Ular xursandlikka toʻlib — toshsin.

⁵Xudoga hamdu sanolar kuylang, Uning nomini tarannum eting. U bulutlarni minib boradi, Uni ulugʻlang. U Egamizdir! Huzurida shodlaning!

⁶U Xudodir, makoni muqaddasdir, Yetimlarning otasi, bevalar himoyachisidir.

⁷Xudo yolgʻizlarni xonadonga joylashtiradi, Asirlarni rohatga, erkinlikka olib chiqadi, Isyonkorlar esa qaqragan yerga ega boʻladi.

⁸Ey Xudo, Oʻz xalqingning oldida borganingda, Sahro boʻylab yurish qilganingda, Zamin titradi, osmon yomgʻirini quydi.

⁹Sening huzuringda, ey Sinay togʻining Xudosi[142], Sening oldingda, ey Isroil xalqining Xudosi, Zamin titradi, osmon yomgʻirini quydi.

¹⁰Sen, ey Xudo, moʻl yomgʻir berding, Toliqqan yeringga[143] qaytadan kuch ato etding.

¹¹Xalqing oʻsha yerda boshpana topdi, Ey Xudo, himmatingdan muhtojlarni bahramand qilding.

¹²Rabbiydan amr keladi, Ayollarning katta jamoasi xushxabarni eltadi:

¹³“Shohlaru lashkarlar shosha — pisha qochdi!” Ha, Isroil ayollari chodirlarda oʻljani boʻlishib oladi!

¹⁴Hatto uyda qolganlar uchun ham Bordir kumush bilan qoplangan kaptar qanotlari, Yaltiroq oltin bilan qoplangan kaptar patlari.

¹⁵Qodir Xudo shohlarni toʻzgʻitganda, Zalmon togʻiga[144] qor yoqqanday boʻldi.

¹⁶Ey Bashanning togʻi[145], ulugʻvor togʻ, Ey choʻqqilari koʻp togʻ, Bashanning togʻi!

¹⁷Ey choʻqqilari koʻp togʻ! Xudo makon qilib tanlagan toqqa[146] Nega hasad bilan qaraysan? Egamiz to abad u yerda istiqomat qiladi.

¹⁸Xudoning jang aravalari son — sanoqsizdir, Rabbiy Sinaydan muqaddas makoniga keladi.

¹⁹Yuksaklarga[147] chiqdi U, Asirlarni ortidan ergashtirdi. Xalqlardan hadyalar oldi, Hatto gunohkor isyonchilardan ham tuhfalar oldi. Axir, Parvardigor Egamiz u yerda yashaydi!

²⁰Rabbiyga olqishlar boʻlsin, U har kuni ogʻirligimizni koʻtaradi. Xudo bizning najotimizdir.

²¹Xudoyimiz — najot berguvchi Xudo, Egamiz Rabbiy oʻlimdan qutqaradi.

²²Xudo shubhasiz dushmanlar boshini yanchadi, Gunoh yoʻlidan yurgan odamning Bosh suyaklarini ham ezadi.

²³Rabbiy shunday deydi: “Dushmanlaringni Bashandan qaytarib kelaman, Ularni dengiz tubidan olib kelaman.

²⁴Oyogʻingni dushmanlaring qoniga botirasan, Itlaring ham dushman qonini yalab, Oʻz ulushini oladi.”

²⁵Ey Xudo, zafarli karvoning koʻrinmoqda! Xudoyim, mening Shohim, Sening karvoning Muqaddas makoningga borayotgani koʻrinmoqda!

²⁶Oldinda qoʻshiqchilar, orqada sozandalar, Ularning oʻrtasida childirma chalgan qizlar kuylar:

²⁷“Olqishlar ayting Xudoga buyuk jamoa ichra, Hamdu sanolar oʻqing Egamizga, Ey Isroilning manbaidan paydo boʻlganlar!”

²⁸Ularning eng kichigi — Benyamin qabilasi oldinda keladi, Ortidan toʻp boʻlib Yahudo shahzodalari keladi, Zabulun, Naftali[148] shahzodalari ularga ergashadi.

²⁹Ey Xudo, koʻrsatgin qudratingni![149] Ey Xudo, avvalgiday namoyon qil kuchingni!

³⁰Quddusdagi Ma’bading haqi — hurmati Shohlar Senga hadyalar keltiradi.

³¹Misrga, qamishzor orasidagi oʻsha yovvoyi hayvonga[150] tanbeh ber, Xalqlarga, oʻsha buqalar podasiga, buzoqlariga tanbeh bergin. Senga ta’zim qilib, kumushlarini nazr qilishsin. Urushdan lazzatlanuvchi bu xalqlarni toʻzgʻitgin.

³²Misrdan bronza keltiriladi[151], Habashiston[152] Senga qoʻllarin choʻzib, ey Xudo, Oʻlpon toʻlashga shoshilib qoladi.

³³Xudoni tarannum eting, ey yer yuzi shohliklari, Samolar — azaliy samolar uzra chiqqan, Haybatli ovozi gulduragan Rabbiyga hamdu sanolar kuylang.

³⁵Hammaga e’lon qiling Xudoning qudratini, Uning ulugʻvorligi Isroil ustidadir, Uning qudrati samolardadir.

³⁶Xudo qoʻrqinchlidir Oʻzining muqaddas maskanida, Isroil xalqining Xudosi kuch — qudrat berar Oʻz xalqiga. Xudoga olqishlar boʻlsin!