Read Uzbek Muqaddas Kitob Zabur 68 Bible Online

Zabur 68 - Uzbek Muqaddas Kitob bible

Zabur 68

¹Ijrochilar rahbariga. “Nilufar” kuyiga aytiladigan Dovud sanosi.

²Ey Xudo, meni Oʻzing qutqar, Suvlar boʻgʻzimga qadar koʻmdi.

³Botqoqqa choʻkib borayotirman, Oyogʻimni qoʻygani qattiq yer yoʻq. Chuqur suvlarga botib ketdim, Endi toʻlqinlar meni yutmoqda.

⁴Madad soʻrab, sillam quridi, Tomoqlarim qaqrab ketdi, Ey Xudoyim, Seni kutib, koʻz nurim soʻndi.

⁵Sababsiz mendan nafratlanganlar Boshimdagi sochimdan ham koʻpdir. Koʻpchilik sababsiz menga dushmandir, Ular jonimga qasd qilmoqchilar. Men oʻgʻirlamagan narsalarni ular, Qaytib ber, deb meni majbur qilmoqdalar.

⁶Ey Xudo, aqlsizligimni Oʻzing bilasan, Ayblarim Sendan aslo yashirin emas.

⁷Ey Sarvari Olam — Rabbiy, Sendan umid qilganlar Men tufayli uyatga qolmasinlar. Ey Isroil xalqining Xudosi, Senga yuz burganlar Men tufayli sharmanda boʻlmasinlar.

⁸Seni deb haqoratga chidadim, Xijolatdan yuzim shuvut.

⁹Aka — ukalarimga goʻyo begonadayman, Tugʻishganlarim orasida musofirdayman.

¹⁰Sening uyingga boʻlgan sevgim ichimni yondirar, Seni haqoratlaganlar meni haqorat qilgan boʻlar.

¹¹Faryod qilib, roʻza tutganimda, Men masxara boʻldim.

¹²Kulfatda qolib, qanor kiyganimda[153], Ular ustimdan kuldilar.

¹³Shahar darvozasi oldida[154] oʻtirganlar Meni gʻiybat qilarlar, Mast — alastlar men toʻgʻrimda qoʻshiq aytarlar.

¹⁴Men esa, ey Egam, Senga ibodat qilaman. Ma’qul vaqtda, sodiq sevging soyasida, ey Xudo, Ishonchli najoting bilan javob ber menga.

¹⁵Meni qutqargin, botqoqqa botib ketmay, Mendan nafratlanganlardan xalos boʻlay, Meni chuqur suvlardan saqlagin.

¹⁶Toʻfon meni gʻarq qilmasin, Tubsiz suvlar meni yutmasin, Qabr menga ogʻzin ochmasin.

¹⁷Javob ber ibodatimga, ey Egam, Naqadar ezgudir sodiq sevging, Buyuk shafqating ila menga yuz burgin.

¹⁸Men, qulingni jamolingdan bebahra qilma, Kulfatda qolganman, javob ber tezda.

¹⁹Yaqinroq kel, qutqargin meni, Dushmanlarimdan xalos qil meni.

²⁰Haqoratga duchor boʻlganim, Sharmandayu sharmisor boʻlganim Oʻzingga ravshan. Hamma dushmanlarimni bilasan.

²¹Haqoratlar qalbimni yaralab, Tushkunlikka tushirdi. Bir hamdard izladim, hech kim yoʻq edi, Tasalli beruvchi izladim — u, topmadim.

²²Ovqatimga ular zahar soldilar, Chanqaganimda menga uzum sirkasi berdilar.

²³Dasturxonlari oʻzlariga tuzoq boʻlsin, Hamtovoqlari uchun qopqon boʻlsin.

²⁴Koʻz nurlari soʻnsin, koʻrmay qolsin, Bellari to abad bukchayib qolsin.

²⁵Ular ustiga gʻazabingni sochgin, Qahring alanga olib, ularni yutib yuborsin.

²⁶Ularning makoni tashlandiq boʻlib qolsin, Chodirlarida tirik bir jon qolmasin.

²⁷Sen urgan insonlarni ular ta’qib qiladi, Sen bergan yara azoblarini ular gʻiybat qiladi.

²⁸Gunohlari ustiga gunoh qoʻshgin, Ularni Sen oqlamagin.

²⁹Nomlari hayot kitobidan oʻchirilsin, Solihlar bilan yonma — yon yozilmasin.

³⁰Men azobda, kulfatda qolganman, Ey Xudo, najoting meni himoya qilsin.

³¹Nomini kuylab, Xudoni madh qilaman, Shukur aytib, Uni maqtayman.

³²Qurbonlik qilingan buzoqdan, hatto buqadan koʻra, Hamdlarim Egamni koʻproq mamnun qiladi.

³³Mazlumlar buni koʻrib, sevinsin, Xudoga intilayotganlar dadil boʻlsin.

³⁴Egamiz muhtojlarni eshitadi, Asir boʻlgan xalqidan nafratlanmaydi.

³⁵Yeru osmon Egamizni madh aylasin, Dengizlaru ulardagi jonzotlar Uni ulugʻlasin.

³⁶Xudo Quddusga[155] najot beradi, Yahudo shaharlarini qayta tiklaydi, Xalq oʻrnashib, u yerni mulk qiladi.

³⁷Xudo qullarining avlodi u yerni egallaydi, Xudoni sevganlar u yerni maskan qiladi.