Read Uzbek Muqaddas Kitob Zabur 7 Bible Online

Zabur 7 - Uzbek Muqaddas Kitob bible

Zabur 7

¹Benyamin qabilasidan boʻlgan Kushning qilmishlari tufayli Dovudning Egamizga aytgan marsiyasi.

²Senda panoh topaman, ey Egam Xudo, Payimga tushganlardan xalos et, qutqar meni.

³Yoʻqsa, ular meni sherday gʻajib tashlaydi, Burda — burda qiladi, hech kim meni qutqarolmaydi.

⁴Ey Egam Xudo! Agarda kimgadir nohaqlik qilgan boʻlsam, Doʻstimni dushmaniga sotgan boʻlsam mabodo, Gʻanimimni sababsiz talagan boʻlsam, Ha, agarda u ishlarni qilgan boʻlsam,

⁶Dushmanlarim ta’qib qilsin, tutsin meni, Tanamni tuproqqa qorsin, Jasadimni yerga tashlasin.

⁷Qani, gʻazabingni sochgin, ey Egam! Qoʻzgʻal yovlarimning qahriga qarshi! Koʻrib, adolat qilgin!

⁸Xalqlarni atrofingga toʻplagin, Balanddagi taxtingda oʻtirib, Ular ustidan hukmronlik qilgin.

⁹Ey Egam, oliy Hakam Oʻzingsan, Sen xalqlarni hukm qilasan. Ey yuksalgan Egam, Hukm paytida yuzimni yorugʻ qil, Bilasan — ku, solihman, begunohman.

¹⁰Fosiqlarning yovuzligi barham topsin, Solihlar barqaror boʻlsin. Ongu yuraklarni sinaguvchi Sensan, Ey odil Xudo!

¹¹Mening qalqonimdir yuksalgan Xudo, Pokdillarga U najot beradi.

¹²Adolatli hakamdir Xudo, Qabihga U doim gʻazabini sochadi.

¹³Agar inson tavba qilmasa, Xudo qilichini charxlaydi, Kamonini tayyor qilib turadi.

¹⁴Qirgʻin qurollarini shay qilib qoʻygan, Olovli oʻqlarini tayyorlab qoʻygan.

¹⁵Ana, qabihlar qabihlikdan urugʻ orttiradi, Dardu balolardan homilador boʻladi, Oxir — oqibatda yolgʻonni tugʻadi.

¹⁶Ular chuqur qaziydilar, Ammo chohga oʻzlari qulaydilar.

¹⁷Ularning dardu balosi oʻziga qaytadi, Zoʻravonligi oʻzlarining boshiga yetadi.

¹⁸Egamizga, adolating uchun shukur, deyman. Egamiz — Xudoyi Taologa hamdu sanolar kuylayman.