Read Uzbek Muqaddas Kitob Zabur 70 Bible Online

Zabur 70 - Uzbek Muqaddas Kitob bible

Zabur 70

¹Ey Egam, Senda men panoh topaman, Sharmanda boʻlishimga aslo yoʻl qoʻymagin.

²Adolatlisan, meni xalos qil, qutqargin, Quloq tut menga, najot bergin.

³Mening panoh qoyam boʻlgin, Har doim Senga bora olay. Meni qutqarmoq uchun amr berding. Chindan ham, Sen suyangan qoyamsan, qal’amsan.

⁴Ey Xudoyim, fosiqning qoʻlidan meni qutqargin, Adolatsiz, zolim odamning iskanjasidan qutqargin.

⁵Sen, ey Egam Rabbiy, mening umidimsan, Yoshligimdan Senga umid bogʻlaganman.

⁶Tugʻilganimdan buyon Senga suyandim, Onamning qornidan meni olib chiqqansan, Doimo Senga hamdu sano aytaman.

⁷Hayotim koʻpchilikka oʻrnak boʻldi, Chunki Sen mening mustahkam panohimsan.

⁸Ogʻzimdan aslo tushmas Senga hamdu sanolar, Kun boʻyi shuhratingni e’lon qilaman.

⁹Keksaygan chogʻimda meni tashlab qoʻymagin, Quvvatim ketganda, meni tark etmagin.

¹⁰Axir, dushmanlarim menga qarshi til biriktiradi, Birga fitna qilib, meni oʻldirmoqchi boʻladi.

¹¹Dushmanlarim aytar: “Xudo tark etgan uni, Quvinglar, ushlanglar uni, Uni qutqaradigan hech kimsa yoʻqdir.”

¹²Ey Xudo, mendan uzoq ketmagin, Tez kel, ey Xudoyim, menga madad ber!

¹³Meni ayblovchilar sharmandalikdan yerga kirib ketsin, Menga zarar yetkazmoqchi boʻlganlar Masxara boʻlsin, badnom boʻlsin.

¹⁴Men esa doimo Senga umid bogʻlayman, Yanada koʻp hamdu sano aytaman.

¹⁵Menga qilganlaringdan hayratga tushdim, Adolatingni har kimga hikoya qilaveraman, Najotingni kun boʻyi soʻylayveraman.

¹⁶Qudratli ishlaringni madh qilaman, ey Egam Rabbiy, Yolgʻiz Sening odilligingni madh qilaman.

¹⁷Ey Xudo, yoshligimdan Sen menga ta’lim bergansan, Ajoyib ishlaringni hamon aytib yuraman.

¹⁸Sochlarim oqarib, keksayganimda, Meni tark etmagin, ey Xudo! Kelgusi avlodlarga kuching haqida aytay, Mendan keyin keladiganlarga Qudrating haqida aytib beray.

¹⁹Adolating samolarga yetadi, ey Xudo, Buyuk ishlar qilding Sen, Senga oʻxshagan kim bor, ey Xudo?!

²⁰Duchor qilding meni koʻp kulfat, azoblarga, Meni yana hayotga qaytarasan, Yer ostidan yana meni chiqarib olasan.

²¹Shuhratimni yana yuksaltirasan, Menga yana taskin berasan.

²²Arfa chalib, Senga hamdu sano aytaman, Sening sadoqatingni kuylayman, ey Xudoyim. Lira chalib, Seni tarannum qilaman, Ey Isroil xalqining Muqaddas Xudosi!

²³Seni madh qilib kuylaganimda, Shodlikdan hayqiraman. Meni Sen qutqargansan.

²⁴Menga zarar yetkazmoqchi boʻlganlar Sharmandayi sharmisor boʻldilar. Kun boʻyi tilim adolating haqida soʻylaydi.