Read Uzbek Muqaddas Kitob Zabur 71 Bible Online

Zabur 71 - Uzbek Muqaddas Kitob bible

Zabur 71

¹Sulaymon sanosi. Ey Xudo, shohga adolatingni bergin, Shoh oʻgʻliga toʻgʻri hukm chiqarishni oʻrgatgin.

²Sening xalqingni u adolat ila hukm etsin, Bechoralarni u toʻgʻrilik bilan hukm etsin.

³Togʻlar xalqqa rohat — farogʻat olib kelsin, Tepaliklar haqiqat samarasini keltirsin.

⁴Shoh xalqning qashshoqlarini himoya qilsin, Bechoralarning bolalariga najot bersin, Zolimlarni ezib tashlasin.

⁵Nasllar osha quyoshu oy samoda turganday, Uning umri ham shunchalik uzoq boʻlsin![156]

⁶Shohimiz oʻxshasin oʻrilgan dalaga, Yoqqan huzurbaxsh yomgʻirga, Yerni sugʻorgan sharros yomgʻirga.

⁷Uning davrida solih yashnasin, Dunyo turguncha moʻl — koʻlchilik boʻlsin.

⁸U bir dengizdan ikkinchisiga qadar, Furot daryosidan tortib, Yer yuzining toʻrt tomoniga hukmronlik qiladi.

⁹Shoh oldida choʻl qabilalari tiz choʻksin, Uning dushmanlari tuproq yalasin.

¹⁰Dengiz ortidagi yurtlarning shohlari, Tarshish[157] shohlari unga oʻlpon olib kelsinlar. Shava[158] hamda Savo[159] shohlari Unga hadyalar keltirsinlar.

¹¹Hamma shohlar unga ta’zim aylasin, Hamma xalqlar unga xizmat qilsin.

¹²Mazlum nola qilganda, shoh najot beradi, Madadkori yoʻq bechorani u qutqaradi.

¹³Zaif, bechoraga u shafqat koʻrsatadi, Mazlumlarning hayotini saqlaydi.

¹⁴Mazlumlarni jabr — zulmdan xalos qiladi, Mazlumlar qoni uning nazarida azizdir.

¹⁵Shohning umri uzoq boʻlsin! Shavaning oltini uniki boʻlsin, Xalq doimo u uchun ibodat qilsin, Kun boʻyi duo qilib, Xudodan baraka tilasin.

¹⁶Yurtda don moʻl — koʻl boʻlsin, Tepaliklar ustida don boshoqlari chayqalib tursin. Lubnon togʻlarida boʻlgani kabi, hosili unumli boʻlsin. Daladagi giyohlar kabi, shaharlari odamga toʻlsin.

¹⁷Shohning nomi mangu yashasin, Uning dongʻi quyosh turguncha bor boʻlsin, Barcha xalqlar u orqali baraka topsin, Xalqlar uni, baxtiyor, deb aytsin.

¹⁸Isroil xalqining Xudosi — Egamizga Olqishlar boʻlsin. Ajoyib ishlar qiladigan yolgʻiz Udir.

¹⁹Egamizning ulugʻvor nomiga to abad olqishlar boʻlsin, Butun yer yuzi Uning shuhrati bilan toʻlsin. Omin! Omin!

²⁰Essay oʻgʻli Dovudning ibodatlari nihoyasiga yetdi.