Read Uzbek Muqaddas Kitob Zabur 72 Bible Online

Zabur 72 - Uzbek Muqaddas Kitob bible

Zabur 72

¹Osif[160] sanosi. Haqiqatan ham, Isroil xalqiga, Yuragi pok boʻlganlarga Xudo himmat qilar.

²Oyoqlarim toyib ketay, dedi, Sal boʻlmasa sirpanib yiqilay, dedim.

³Fosiqning yashnayotganini koʻrganimda, Takabburlarga hasad qildim.

⁴Ular ogʻriq nimaligini bilmaydilar[161], Tanalari soppa — sogʻ, baquvvat.

⁵Boshqalarday ular dard tortmaydilar, Boshqalarday ular azob chekmaydilar.

⁶Kiborlik ularning boʻynidagi marjon boʻladi, Zoʻravonlikni ular libos qilib kiyib olgan.

⁷Ularning koʻzlarini yogʻ bosib qolgan, Xayollarida ahmoqona niyatlar toʻlib — toshgan.

⁸Takabburlar masxaralab, xusumat bilan gapiradi, Magʻrurlanib, zulm bilan tahdid qiladi.

⁹Fosiqlar ogʻizlari bilan osmonga da’vo qiladi, Tillari bilan yer yuzini mulk qilib oladi.

¹⁰Shu bois har kim ularga yuz buradi, Ularning soʻzlarini suv kabi ichadi[162].

¹¹Yana ular shunday deydilar: “Xudo qanday qilib bila oladi?! Xudoyi Taolo nimani ham bilardi?!”

¹²Fosiqlar ana shunaqa! Doimo betashvish boylik orttiradi.

¹³Ha, men bekorga yuragimni pok tutgan ekanman — da! Aybsizman, deya bekorga qoʻllarimni yuvibman — da!

¹⁴Axir, kun boʻyi azob tortaman, Har kuni ertalab jazo olaman.

¹⁵Men ham fosiq gaplarni gapiraverganimda, Sening sodiq farzandlaringga xoinlik qilgan boʻlar edim.

¹⁶Ammo bularni tushunay, desam, Bu ish juda ham mashaqqatli tuyuldi.

¹⁷Xudoning muqaddas maskaniga kirdim, Shundagina fosiqlar qismati ne boʻlishini tushundim.

¹⁸Ey Xudo, chindan ham ularni sirpanchiq yerga qoʻygansan, Ularni jarlikka uloqtirib, barbod qilasan.

¹⁹Ular birdan qirilib ketadi, Vahimadan qirilib, yoʻq boʻladi.

²⁰Ularning hayoti faqat tushdir, Uygʻonganlarida unut boʻladi. Sen ham qoʻzgʻalganingda, ey Rabbiy, Ularning hayotiga chek qoʻyasan.

²¹Gʻamga toʻlgan paytlarimda, Yuragimda dard paydo boʻlganda,

²²Men nodon, johil boʻlgan ekanman, Qarshingda ongsiz hayvon kabi boʻlgan ekanman.

²³Shunday boʻlsa ham, doimo Sen bilanman, Sen oʻng qoʻlimdan ushlagansan.

²⁴Oʻgitlaring bilan menga yoʻl koʻrsatasan, Oxiri meni shon — shuhrat ila kutib olasan.

²⁵Sendan boshqa kimim bor samoda?! Sendan oʻzgasini istamasman yer yuzida.

²⁶Ado boʻlishi mumkin tanamu yuragim, Ammo Sen, ey Xudo, qalbimning quvvatisan, Sen to abad barqarorligimsan.

²⁷Sendan uzoq boʻlganlar halok boʻladi, Qirib tashlaysan Senga sodiq boʻlmaganlarni.

²⁸Ey Xudo, Senga yaqin boʻlganim esa menga yaxshidir. Ey Egam Rabbiy, Seni panohim qilib oldim, Sening hamma ishlaringni aytib yuraman.