Read Uzbek Muqaddas Kitob Zabur 73 Bible Online

Zabur 73 - Uzbek Muqaddas Kitob bible

Zabur 73

¹Osif[163] qasidasi[164]. Ey Xudo! Nechun bizni to abad rad etasan?! Nechun yaylovdagi qoʻylaringga gʻazabingni sochasan?!

²Azalda Oʻzingniki qilib olgan xalqingni yodingda tut. Oʻzimning mulkim boʻlsin deb, qutqargan xalqingni, Oʻzing maskan qilgan Sion togʻini yodingda tut.

³Dahshatli bu xaroba tomon qadam bosib koʻr, Qara, muqaddas maskandagi borini gʻanim yoʻq qildi.

⁴Gʻanimlaring shovqin — suroni muqaddas maskaningni toʻldirdi, Bayroqlarini ular belgi qilib oʻrnatdi.

⁵Oʻzlarini boltasi bor odamday tutdilar, Oʻrmondagi daraxt kesuvchilarday tutdilar.

⁶Soʻngra boltayu bolgʻalar bilan Parchaladilar uning oʻymakor ishlarini.

⁷Muqaddas maskaningga oʻt qoʻydilar, Sen ulugʻlanadigan makonni harom qildilar, Ma’badingni yer bilan bitta qildilar.

⁸“Ularni tamomila qirib tashlaymiz”, deb oʻz koʻnglida aytdilar, Yurtdagi barcha sajdagohlarni yoqib tashladilar.

⁹Bironta ham paygʻambar qolmadi, Moʻjiza alomatlarini topa olmaymiz. Qachongacha davom etar bu? Birontamiz bilmaymiz.

¹⁰Ey Xudo, qachongacha gʻanim Seni masxara qilar?! Seni dushman to abad haqorat qilarmi?!

¹¹Nechun oʻng qoʻlingni ishga solmaysan?! Qoʻlingni qoʻyningdan chiqarib, Ularni qirib tashlagin!

¹²Ey Xudo, azaldan mening Shohimsan, Yer yuziga Sen najot olib kelasan.

¹³Qudrating bilan dengizni boʻlgan Sensan, Dengiz ajdarlarining boshini majaqlagansan.

¹⁴Maxluq Levitanning[165] boshlarini ezib tashlagansan, Choʻl jonzotlariga[166] uni yemish qilib bergansan.

¹⁵Buloqlaru anhorlarni ochgan Sensan, Oqar daryolarni quritgan ham Sensan.

¹⁶Kunduz Senikidir, tun ham Seniki, Quyosh va oyni[167] bunyod etgansan.

¹⁷Zaminning chegarasini Sen oʻrnatgansan, Yoz va qishni ham oʻrnatgan Sensan.

¹⁸Ey Egam, dushmanning masxaralashini, Ahmoq odamlar Seni haqoratlashini yodingda tut.

¹⁹Kaptarlaring hayotini yovvoyi hayvonlarga berma, Mazlum xalqingning hayotini to abad unutma.

²⁰Biz bilan qilgan ahdingni esla, Yurtdagi zulmat joylar zoʻravonlikka toʻla.

²¹Sharmandalikka mazlum duchor boʻlmasin, Faqiru bechora Senga hamdu sano aytsin.

²²Qani, ey Xudo, da’voingni isbot qilgin, Ahmoqlar kun boʻyi Seni masxara qilishini yodda tut.

²³Dushmanlaring shovqin — suroni koʻtarilaveradi, Ularning baqir — chaqirigʻini e’tiborsiz qoldirma.