Read Uzbek Muqaddas Kitob Zabur 76 Bible Online

Zabur 76 - Uzbek Muqaddas Kitob bible

Zabur 76

¹Ijrochilar rahbari Yodutunga[176]. Osif[177] sanosi.

²Faryod qilib, Xudoga yolvoraman, Eshitgin meni, deb Xudoga hayqiraman[178].

³Qaygʻuli kunimda Rabbiyga intildim, Tunda qoʻllarimni koʻtarib iltijo qildim, Jonim tasalli topishni rad etdi.

⁴Ey Xudo, Seni oʻylaganimda, Figʻon chekaman, ruhim zaiflashadi.

⁵Tun boʻyi Sen meni bedor qilding, Soʻzlay olmayman azoblanganimdan.

⁶Oldingi kunlar haqida oʻylab yurdim, Eski davrlarni eslab yurdim.

⁷Tun boʻyi oʻzim bilan oʻzim suhbat qurdim[179], Qalbim xayolga berilib, ruhim soʻrab — surishtirdi:

⁸“Rabbiy to abad bizni rad etarmikan? Hech qachon shafqat koʻrsatmasmikan?

⁹Uning sodiq sevgisi to abad yoʻqolganmi? Uning va’dalari bir umrga tamom boʻlganmi?

¹⁰Xudo shafqatli boʻlishni unutib qoʻydimi? Rahmdillik oʻrnini gʻazab egalladimi?”

¹¹Oʻzimga oʻzim dedim: “Xudoyi Taolo oʻng qoʻli orqali Endi bizga yordam bermayapti. Bu mening kulfatimdir.”

¹²Ey Egam, ishlaringni men yodga olaman, Azaliy moʻjizalaringni esga olaman.

¹³Hamma ishlaringni xayolimdan oʻtkazaman, Qudratli ishlaring haqida fikr yuritaman.

¹⁴Sening yoʻling, ey Xudo, muqaddasdir, Qaysi xudo Senday buyukdir?!

¹⁵Moʻjizalar yaratuvchi Xudo Sensan, Xalqlar orasida qudratingni koʻrsatgan Sensan.

¹⁶Qudrating bilan Oʻz xalqingni, Yoqub hamda Yusuf nasllarini qutqargansan.

¹⁷Ey Xudo, suvlar Seni koʻrganda, Ha, suvlar Seni koʻrganda, qoʻrqib ketdilar, Tubsiz dengizlar larzaga keldi!

¹⁸Bulutlar yomgʻirin quydi, Samolar gumburlab yangradi, Oʻqlaring har tomonda Yalt etib paydo boʻldi.

¹⁹Gumbur — gumbur eshitildi quyun ichida, Chaqmoqlaring olamni yoritdi, Zamin titrab, tebrandi.

²⁰Yoʻling dengiz orqali oʻtdi, Soʻqmogʻing bahaybat suvlardan oʻtdi, Izlaring esa koʻrinmas edi.

²¹Xalqingni qoʻy suruviday yetaklab bording, Muso, Horunni rahnamo qilib tanlading.