Read Uzbek Muqaddas Kitob Zabur 79 Bible Online

Zabur 79 - Uzbek Muqaddas Kitob bible

Zabur 79

¹Ijrochilar rahbariga. “Nilufar” kuyiga aytiladigan Osif[206] sanosi.

²Tingla bizni, ey Isroilning Choʻponi, Yusuf naslini[207] qoʻy suruviday yetaklab chiqqan Sensan, Karublar orasida taxt qurgansan, Efrayim, Benyamin, Manashe[208] oldida nuringni soch. Qudratingni koʻrsat, bizni qutqargani kel.

⁴Ey Xudo, bizni oldingi holimizga qaytargin, Jamoling bizga nurlarini sochsin, najot topaylik.

⁵Ey Parvardigori Olam — Egamiz, Qachongacha gʻazablanib, ibodatimizni rad etasan?

⁶Koʻz yoshlar berding bizga non oʻrniga, Chelak toʻla koʻz yoshlarni bizga ichirding.

⁷Qoʻshnilar bizdan nafratlanishiga imkon berding, Dushmanlarimiz bizni masxara qilmoqda.

⁸Ey Parvardigori Olam, bizni oldingi holimizga qaytargin, Jamoling bizga nurlarini sochsin, najot topaylik.

⁹Tok novdasini sugʻurganday, Bizni Misrdan keltirding. Begona xalqlarni quvib, bizni oʻtqazding.

¹⁰Biz uchun tuproq tayyorlading, Ildiz otib, yurtni toʻldirdik.

¹¹Togʻlar bizning soyamiz bilan qoplandi, Bahaybat sadrlar ham novdalarimiz bilan qoplandi.

¹²Biz shoxlarimizni dengizgacha[209] yoydik, Novdalarimiz Furot daryosigacha choʻzildi.

¹³Nega endi bogʻning devorlarini buzib tashlading? Oʻtgan — ketganlar mevalarini yulsin debmi?

¹⁴Yovvoyi toʻngʻizlar uni xarob qiladi, Yovvoyi jonivorlar[210] undan yeb qornini toʻygʻizadi.

¹⁵Qayt yana bizga, ey Parvardigori Olam! Nazar solgin, qara samodan, Bu tok novdasini qoʻriqlagin.

¹⁶Oʻng qoʻling oʻtqazgan ildizni, Oʻzing oʻstirgan novdani[211] qoʻriqlagin.

¹⁷Gʻanimlaring uzum tokingni qirqqan edi, Uzum tokingni olovda yondirgan edi, Gʻazabli boqishingdan ular yoʻq boʻlsin.

¹⁸Oʻzing tanlaganingga, Oʻzing uchun kuchli qilgan xalqqa[212] tayanch boʻlgin.

¹⁹Shunda biz hech qachon Sendan qaytmaymiz, Senga sajda qilamiz, bizga hayot ato qil.

²⁰Ey Parvardigori Olam — Egamiz, Bizni oldingi holimizga qaytargin, Jamoling bizga nurlarini sochsin, najot topaylik.