Read Uzbek Muqaddas Kitob Zabur 80 Bible Online

Zabur 80 - Uzbek Muqaddas Kitob bible

Zabur 80

¹Ijrochilar rahbariga. Soz joʻrligida aytiladigan Osif[213] sanosi.

²Xudoga, qudratimiz manbaiga Sevinch bilan kuylang! Yoqubning Xudosiga shodlik ila hayqiring!

³Qoʻshiq kuylang, doira cherting, Xushovoz lira, arfa chaling.

⁴Burgʻu chaling yangi oy shodiyonasida, Oy toʻlganda, bayram kunimizda[214].

⁵Isroil uchun bu qonundir, Yoqub Xudosining farmonidir.

⁶Misr yurti ustiga bostirib borganda, Xudo buni Isroilga[215] qonun qilib berdi. Men notanish bir ovozni eshitdim:

⁷“Yukni oldim yelkangizdan, — deydi U. — Qoʻllaringiz savatdan ozod boʻldi[216].

⁸Kulfatda Menga faryod qildingiz, sizni qutqardim, Bulutlar orasidan sizlarga javob berdim, Mariva suvlari boʻyida[217] sizlarni sinadim.

⁹Eshiting, ey xalqim, tanbeh beraman sizga, Ey Isroil, koshkiydi quloq solsangiz Menga!

¹⁰Orangizda begona xudolar boʻlmasin, Boshqa xudolarga sajda qilmanglar.

¹¹Men sizlarning Egangiz Xudoman, Sizlarni Misr yurtidan Men olib chiqqanman, Ogʻzingizni katta oching, Men uni toʻldiraman.

¹²Ey xalqim, siz esa ovozimga quloq solmadingiz, Ey Isroil, Menga itoat etishni rad etdingiz.

¹³Oʻz bilganingizcha yashang, deya Yuraklaringizni oʻjarligicha qoldirdim.

¹⁴Eh, qaniydi siz Menga quloq solsangiz, Ey Isroil, Mening yoʻllarimdan yursangiz!

¹⁵Tezda dushmanlaringizni boʻysundirardim, Sizning gʻanimlaringizga zarba berardim.

¹⁶Men, Egangizdan nafratlanganlar Qoʻrquvdan titrab, tiz choʻkkan boʻlardi, Ularning halokati to abad davom etardi.

¹⁷Sizlarni bugʻdoyning eng yaxshisi bilan boqardim, Qoyadan asal chiqarib, sizlarni toʻydirardim.”