Read Uzbek Muqaddas Kitob Zabur 84 Bible Online

Zabur 84 - Uzbek Muqaddas Kitob bible

Zabur 84

¹Ijrochilar rahbariga. Koʻrax naslining[237] sanosi.

²Ey Egam, Oʻz yurtingga marhamat koʻrsatgansan, Yoqub naslini yana farovonlikka erishtirgansan.

³Xalqingning ayblarini unutgansan, Ularning gunohlarini kechirgansan.

⁴Butun gʻazabingni jilovlading, Qahru gʻazabingdan qaytding.

⁵Ey najotkorimiz Xudo, Oldingi holimizga bizni qaytargin, Bizga qarshi boʻlgan gʻazabingni toʻxtatgin.

⁶Sen bizdan to abad gʻazablanasanmi? Gʻazabingni nasllar osha sochaverasanmi?

⁷Xalqim Menda sevinch topsin deya, Bizga yana yangi hayot baxsh etmaysanmi?

⁸Ey Egam, bizga sodiq sevgingni koʻrsat, Bizga najotingni ato qil.

⁹Parvardigor Egamiz aytayotganiga quloq solaman, U Oʻz xalqiga, Oʻz taqvodorlariga tinchlik va’da qilayotir, Endi ular bema’ni yoʻllariga[238] qaytmasin.

¹⁰Shubhasiz, Egamizdan qoʻrqqanlarga Uning Oʻzi najot berishga tayyor turadi, Bizning yerimizda Uning ulugʻvorligi makon topadi.

¹¹Sevgi va haqiqat uchrashadi, Adolat, tinchlik bir — biri ila oʻpishadi.

¹²Haqiqat zamindan oʻsib chiqadi, Adolat samodan turib boqadi.

¹³Egamiz chindan ne’matin yogʻdiradi, Yerimiz oʻz hosilini beradi.

¹⁴Adolat Egamizning oldida yuradi, Uning qadamlari uchun yoʻl tayyorlaydi.