Read Uzbek Muqaddas Kitob Zabur 85 Bible Online

Zabur 85 - Uzbek Muqaddas Kitob bible

Zabur 85

¹Dovud ibodati. Tinglagin, ey Egam, javob ber menga, Men muhtoj hamda yoʻqsilman.

²Taqvodorman, jonimni asragin, Senga umid qilaman, men, qulingni qutqargin. Sen mening Xudoyimsan.

³Shafqat qilgin menga, ey Rabbiy, Kun boʻyi Senga iltijo qilmoqdaman.

⁴Men, qulingga shodlik baxsh etgin, Ey Rabbiy, men Senga yuragimni ochaman.

⁵Sen, ey Rabbiy, yaxshisan, kechirimlisan, Senga iltijo qilganlarga Sodiq sevgingni koʻrsatasan.

⁶Ibodatimga quloq sol, ey Egam, Shafqat soʻrab qilgan iltijoimga diqqat qil.

⁷Ogʻir kunda Senga iltijo qilaman, Iltijolarimga Sen javob berasan.

⁸Ey Rabbiy, xudolar orasida Hech qaysisi Senga oʻxshamaydi, Bironta buyuk ishni Seniki bilan qiyoslab boʻlmaydi.

⁹Jamiki xalqlarni Sen yaratgansan, Ey Rabbiy, ular kelib, Senga ta’zim qiladi, Nomingga shuhrat keltiradi.

¹⁰Zero, Sen buyuksan, moʻjizalar koʻrsatasan, Sen tanho Xudosan.

¹¹Yoʻlingni menga koʻrsat, ey Egam, Toki toʻgʻri soʻqmoqlaringdan yuray, Menga sobit qalb bergin, Men Sendan qoʻrqayin.

¹²Ey Rabbim Xudo, butun yuragim ila Senga shukur aytaman! To abad Sening nomingni ulugʻlayman.

¹³Menga boʻlgan sodiq sevging gʻoyat buyukdir, Oʻliklar diyoridan[239] jonimni qutqargansan.

¹⁴Ey Xudo, takabburlar menga hujum qilmoqda, Zoʻravonlar toʻdasi jonim payiga tushgan. Ular Senga aslo e’tibor bermaydi.

¹⁵Sen, ey Rabbiy, rahmdil va inoyatli, Jahli tez chiqmaydigan Xudosan, Sevging va sadoqating moʻldir.

¹⁶Holimga boq, mehr — shafqat qil, Men qulingman, Oʻz choʻringning oʻgʻliman. Menga qudratingdan ato qil, Meni qutqargin.

¹⁷Marhamating alomatini menga koʻrsatgin, Toki gʻanimlarim buni koʻrib, sharmanda boʻlsin. Meni qoʻllab, tasalli bergansan, ey Egam.