Read Uzbek Muqaddas Kitob Zabur 87 Bible Online

Zabur 87 - Uzbek Muqaddas Kitob bible

Zabur 87

¹Ijrochilar rahbariga. Koʻrax naslining[246] sanosi. “Qaygʻu — alam” kuyiga aytiladigan qoʻshiq. Zerax urugʻidan boʻlgan Xamanning qasidasi[247].

²Ey Egam, najotkorim Xudo, Kecha — kunduz faryod qilaman oldingda.

³Ibodatim Senga yetib borsin, Qulogʻingni dodimga tutgin.

⁴Hayotim kulfatga toʻla, Oʻzim oʻliklar diyoriga[248] yaqinlashganman.

⁵Meni qabrga tushganlar orasida hisoblaydilar, Bemajollarga oʻxshab qolganman.

⁶Murdalar orasiga tashlanganman, Qabrda yotgan marhumlarga oʻxshayman, Sen meni oʻshalarday unutgansan, Ular Sening himoyangdan mahrumdirlar.

⁷Sen tashlading meni qabrning eng tubiga, Eng zulmat, chuqur joylarga.

⁸Gʻazabing ustimdan zilday bosadi, Qahring toʻlqinlari ila meni ezasan.

⁹Yaqin doʻstlarimdan meni ayirding, Ularga meni jirkanch qilding, Qamalib qolganman, xalos boʻla olmayman.

¹⁰Koʻzlarim nuri gʻamdan adoyi tamom boʻldi. Ey Egam, har kuni[249] Senga iltijo qilaman, Qoʻllarimni Sen tomon choʻzaman.

¹¹Moʻjizalaringni marhumlarga koʻrsatasanmi?! Murdalar turib, Senga hamdu sano aytarmikan?!

¹²Sening sodiq sevging qabrda e’lon qilinarmi?! Halokat diyorida[250] Sening sadoqating haqida aytilarmi?!

¹³Zulmat diyorida moʻjizalaring ma’lum boʻlarmi?! Unutilganlar makonida[251] odilliging haqida soʻylanarmi?!

¹⁴Ey Egam, men Senga faryod qilaman, Ibodatim sahardanoq Senga yetib boradi.

¹⁵Ey Egam, nechun meni rad qilasan? Nechun mendan yuz oʻgirasan?

¹⁶Yoshligimdan buyon xastaman, oʻlim bilan yuzma — yuzman, Vahimalaring qarshisida umidsiz qolganman[252].

¹⁷Qahru gʻazabing meni ezib tashladi, Vahimalaring meni adoyi tamom qildi.

¹⁸Qahr — gʻazabing kun boʻyi meni toʻfonday oʻrab oladi, Meni har tarafdan qurshab oladi.

¹⁹Yaqin doʻstimdan, qoʻshnimdan meni ayirding, Faqat zulmat mening sherigim boʻlib qoldi.