Read Uzbek Muqaddas Kitob Zabur 88 Bible Online

Zabur 88 - Uzbek Muqaddas Kitob bible

Zabur 88

¹Zerax urugʻidan boʻlgan Etxanning qasidasi[253].

²Sening sodiq sevgingni, ey Egam, to abad kuylayman, Barcha nasllarga sadoqatingni oʻz ogʻzim bilan e’lon qilaman.

³Bilaman, Sening sodiq sevging to abad mustahkamdir, Sening sadoqating samolarday barqarordir.

⁴Sen shunday deding[254]: “Oʻzim tanlaganim bilan ahd qilganman. Ha, qulim Dovudga qasamyod qilganman:

⁵«Sening naslingni to abad mustahkam qilaman, Taxtingni butun avlodlar osha oʻrnataman.»”

⁶Ajoyibotlaringga, ey Egam, samolar hamdu sano aytsin, Muqaddas malaklar Sening sadoqatingni kuylasin.

⁷Ey Egam, samolarda Senga tenglashadigani bormikan?! Ilohiy zotlardan[255] qaysi biri Senga oʻxsharkan?!

⁸Ey Xudo, muqaddas malaklar davrasida[256] haybatlisan, Taxting atrofidagilarning hammasidan qoʻrqinchlisan.

⁹Ey Parvardigori Olam — Egam, Kim Senchalik qudratli, ey Egam?! Sadoqating atrofingni oʻragan.

¹⁰Asov dengizni yoʻlga solguvchi Sensan, Toʻlqinlar quturganda bosguvchi Sensan.

¹¹Jasadni ezganday maxluq Rahobni[257] ezding, Qudratli qoʻling bilan gʻanimlaringni tarqatding.

¹²Samolar Senikidir, zamin ham Senikidir, Olamu undagi har narsa Senikidir, Hammasini Sen mustahkam qurgansan.

¹³Shimolu janubni ham Sen yaratgansan, Tovur, Xermon togʻlari[258] Sening noming tufayli shodlikdan kuylaydi.

¹⁴Bilaging naqadar qudratlidir! Qoʻling kuchli, oʻng qoʻling muzaffardir!

¹⁵Adolat va haqqoniyatdir taxtingning poydevori, Oldingda yuradi sevgi va sadoqat.

¹⁶Baxtlidir sevinch hayqiriqlarini bilgan xalq, Ey Egam, huzuring nurida yurgan xalq baxtlidir!

¹⁷Sening noming tufayli ular kun boʻyi sevinadi, Sening adolating tufayli ular yuksaladi.

¹⁸Zotan, Sen ularning kuchi, shuhratisan, Qudratimiz yuksalar Sening lutf — karamingdan.

¹⁹Ey Egam, qalqonimizni Sen tanlading, Ey Isroil xalqining Muqaddas Xudosi, Sen bizga shohimizni berding.

²⁰Qadimda Sen taqvodorlaringga vahiyda aytdingki: “Mashhur jangchiga Men kuch berdim, Xalq orasidan yosh yigitni yuksaltirdim.

²¹Qulim Dovudni Men topdim, Muqaddas moyimni surtib uni tanladim[259].

²²Mening qoʻlim doim uni quvvatlaydi, Bilagim uni kuchli qiladi.

²³Gʻanim uni alday olmaydi, Zolim uni qisa olmaydi.

²⁴Uning koʻz oʻngida dushmanlarini ezib tashlayman, Uni yomon koʻrganlarni qirib tashlayman.

²⁵Sadoqatim, sodiq sevgim u bilan boʻladi, Men tufayli uning qudrati yuksaladi.

²⁶Uning qudratini dengiz uzra barqaror qilaman, Uning hukmronligini daryolar uzra oʻrnataman.

²⁷U Menga aytadi: «Sen Otamsan! Xudoyimsan, najotim qoyasi Sensan.»

²⁸Men uni toʻngʻich oʻgʻil qilib olaman[260], Yer yuzi shohlarining qudratlisi qilaman.

²⁹Unga boʻlgan cheksiz sevgimda to abad sobit turaman, U bilan qilgan ahdimni davom ettiraman.

³⁰Uning naslini to abad mustahkam qilaman, Uning taxti osmon turguncha turadi.

³¹Bordi — yu, uning nasli qonunimdan yuz oʻgirsa, Mening qoidalarim boʻyicha ular yurmasalar,

³²Agarda farmonlarimni buzsalar, Mening amrlarimga rioya etmasalar,

³³Ularni itoatsizligi uchun xivich bilan jazolayman, Gunohi uchun ularni tayoq bilan jazolayman.

³⁴Dovuddan esa sevgimni darigʻ tutmayman, Sadoqatimga aslo xiyonat etmayman.

³⁵Men ahdimni buzmayman, Aytgan soʻzimdan aslo qaytmayman.

³⁶Muqaddas nomim haqi ilk va soʻng marta ont ichdim, Dovudni Men aslo aldamayman.

³⁷Uning nasli to abad davom etadi, Uning taxti qarshimda quyosh kabi turadi.

³⁸Oyga, samolardagi oʻsha sodiq guvohga oʻxshab, Taxti to abad mahkam turadi.”

³⁹Endi esa, ey Egam, Sen uni nafrat bilan rad etding, Oʻzing shoh qilib tanlaganingdan gʻoyat gʻazablanding.

⁴⁰Men — Oʻz quling bilan qilgan ahdingdan qaytding, Uning tojini Sen tuproqqa qording.

⁴¹Shaharlarining hamma devorlarini qulatding, Qal’alarini vayronaga aylantirding.

⁴²Yoʻldan oʻtayotganlarning hammasi uni taladi, Qoʻshni xalqlarga u masxara boʻldi.

⁴³Shohimizning dushmanlarini gʻolib qilding, Uning hamma gʻanimlarini sevintirding.

⁴⁴Qilichining damini qaytarding, Jangda unga Sen madad bermading.

⁴⁵Uning ulugʻvorligiga Sen chek qoʻyding, Taxtini yerga uloqtirib yubording.

⁴⁶Yoshlik kunlarini qisqartirding, Uni sharmandayu sharmisor qilding.

⁴⁷Ey Egam, bu qachongacha davom etadi? Oʻzingni bizdan to abad yashirasanmi? Qachongacha gʻazabing otash kabi yonadi?

⁴⁸Esingda tut, hayotim naqadar qisqa, Ne uchun insonni behuda yaratding?!

⁴⁹Qaysi inson oʻlimni koʻrmas ekan?! Kim oʻliklar diyori[261] changalidan omon qolar ekan?!

⁵⁰Ey Rabbiy, qani oldingi buyuk sevging? Sadoqating ila buni Dovudga va’da bergan eding — ku!

⁵¹Ey Rabbiy, men, quling, qanchalar masxara boʻlganimni[262] yodingda tut. Hamma xalqlarning haqoratlarini bagʻrimda koʻtarib yuribman — ku!

⁵²Ey Egam, dushmanlaring tanlagan shohingni masxaralaganini, Uning har bir qadamini tahqir etganlarini yodda tut!

⁵³Egamizga to abad olqishlar boʻlsin! Omin! Omin!