Read Uzbek Muqaddas Kitob Zabur 90 Bible Online

Zabur 90 - Uzbek Muqaddas Kitob bible

Zabur 90

¹Xudoyi Taolo panohida yashaydiganlar Qodir Xudo soyasida orom topar.

²Men Egamga shunday deyman: “Sen panohimsan, qal’amsan, Men umid bogʻlagan Xudoyimsan.”

³Albatta U xalos etar seni ovchining tuzogʻidan, Xalos etar seni qirgʻin keltiruvchi vabodan.

⁴Seni U qanotlari ostiga olar, Uning panohida bexatar boʻlasan, Sadoqati bilan senga qalqon, devor boʻlar.

⁵Shunda qoʻrqmaysan tunning vahimasidan, Qoʻrqmaysan kunduzi uchgan oʻqdan,

⁶Zulmatda bildirmay keladigan vabodan, Qoq peshinda qirgʻin keltiruvchi oʻlatdan.

⁷Mingtasi chap yoningda yiqilib qoladi, Oʻn mingtasi oʻng yoningda yiqilib qoladi, Ammo bu kulfatlar senga yaqin kelmaydi.

⁸Faqat koʻzlaringni och, shunda koʻrasan Fosiqning qanday jazo olganini.

⁹Agar Egamizni panohing qilsang, Boshingga biron baxtsizlik kelmas. Xudoyi Taoloni qoʻrgʻoning qilsang, Biron falokat chodiringga yoʻlamas.

¹¹U sen toʻgʻringda farishtalariga amr beradi, Farishtalar hamma yoʻllaringni qoʻriqlaydi.

¹²Oyogʻing toshga qoqilib ketmasin deya, Farishtalar qoʻllarida seni koʻtarib boradi.

¹³Sher va zaharli ilon[264] ustidan bosib oʻtasan, Yirtqich sher, ilonni oyogʻing bilan ezasan.

¹⁴Egamiz shunday deydi: “U Meni yaxshi koʻrgani uchun Men uni qutqaraman. Meni bilgani uchun Men uni himoya qilaman.

¹⁵U iltijo qilganda Men javob beraman, Ogʻir kunlarida u bilan birga boʻlaman, Uni qutqarib, unga izzat koʻrsataman.

¹⁶Uzoq umr berib, uni mamnun qilaman, Unga najot beraman.”