Read Uzbek Muqaddas Kitob Zabur 93 Bible Online

Zabur 93 - Uzbek Muqaddas Kitob bible

Zabur 93

¹Ey Egam, Sen qasoskor Xudosan, Ey qasoskor Xudo, nuringni soch!

²Qani, boʻl, ey yer yuzini hukm etguvchi, Magʻrurlarning jazosini ber.

³Qachongacha fosiqlar tantana qilar? Ey Egam, qachongacha?

⁴Ogʻizlaridan balandparvoz soʻzlar otilib chiqyapti — ku! Hamma badkirdorlar maqtanyapti — ku!

⁵Ey Egam, ular xalqingni ezyapti, Oʻzing tanlagan elatingga zulm qilyapti.

⁶Beva, musofirni ular oʻldiryapti, Yetimlarni yoʻq qilyapti.

⁷Ular aytyapti: “Egamiz koʻrmas, Yoqubning Xudosi e’tibor bermas.”

⁸Tushunib oling, ey xalq orasidagi tentaklar. Qachon sizlarga aql kirar, ey ahmoqlar?!

⁹Quloqni yaratgan eshitmaydimi?! Koʻzni ato etgan koʻrmaydimi?!

¹⁰Xalqlarga tanbeh beruvchi jazolamaydimi?! Uning Oʻzi insonga oʻrgatadi — ku!

¹¹Egamiz insonning niyatini anglaydi, Niyatlarimiz behudaligini biladi.

¹²Ey Egam, baxtlidir Sening tanbehingni olganlar, Baxtlidir Sening qonuningdan oʻrganuvchilar.

¹³Yomon kunlardan ularni Sen omon saqlaysan. Fosiq uchun chuqur qazilguncha ular omon boʻladilar.

¹⁴Ey Egam, Oʻz xalqingni tark etmaysan, Oʻzing tanlagan elatingni tashlab qoʻymaysan.

¹⁵Hukmning asosi yana adolat boʻladi, Jamiki pokdillar adolatni qoʻllab — quvatlaydi.

¹⁶Fosiqlardan kim meni himoya qiladi? Badkirdorlarga qarshi kim men tomon boʻladi?

¹⁷Ey Egam, agarda Sen menga yordam bermaganingda, Mening jonim tezda oʻlim sukunatiga choʻkardi.

¹⁸“Oyoqlarim qoqiladi”, deb oʻylaganimda, Ey Egam, sodiq sevging meni qoʻlladi.

¹⁹Ichim xavotirga toʻlib ketganda, Sen bergan tasalli menga quvonch keltirdi.

²⁰Zolim hukmdorlar Xudoga sherik boʻlarmi?! Axir, ular farmonlari bilan kulfat keltiradi — ku!

²¹Ular solihlarga qarshi birlashadi, Gunohsizlarni oʻlimga mahkum etadi.

²²Ammo Egam mening qal’amdir, Mening panoh qoyam Xudodir.

²³Fosiqligi uchun Egamiz ularni qirib tashlaydi, Gunohlari uchun jazosini beradi. Ha, Egamiz Xudo ularni ildizidan quritadi.