Read Uzbek Muqaddas Kitob Zabur 95 Bible Online

Zabur 95 - Uzbek Muqaddas Kitob bible

Zabur 95

¹Ey olam, Egamizni tarannum eting! Egamizga yangi bir qoʻshiq ayting.

²Egamizni tarannum eting, Unga olqishlar boʻlsin, Uning bergan najotidan har kuni soʻylang.

³E’lon qiling elatlar orasida Uning shuhratini, Jamiki xalqlar orasida Uning ajoyibotlarini.

⁴Egamiz buyukdir, koʻp maqtovga loyiqdir, Jamiki xudolardan U izzatlidir.

⁵Zotan, xalqlarning hamma xudolari butlardir, Egamiz esa samolarni yaratgandir.

⁶Shuhratu ulugʻvorlik Uning huzuridadir, Qudratu goʻzallik Uning muqaddas maskanidadir.

⁷Egamizga hamdlar ayting, ey zamin xalqlari! Egamizning qudratiyu shuhratiga hamdlar oʻqing!

⁸Egamizning sharafiga sanolar ayting! Nazrlar keltirib, Uning hovlisiga kiring!

⁹Muqaddas ulugʻvorlikka burkangan Egamizga sajda qiling![270] Ey zamin ahli, Uning oldida titrab turing!

¹⁰Elatlar orasida aytingki: “Egamiz Shohdir! Olam mustahkam oʻrnashgan, hech qachon tebranmaydi, U xalqlarni haqqoniy hukm qilar.”

¹¹Samolar shod boʻlsin, zamin quvonsin, Dengizu undagi hamma jonzot guvullasin.

¹²Dalalaru undagi har narsa sevinch ila joʻshsin, Oʻrmondagi hamma daraxt shodlikdan qoʻshiq aytsin.

¹³Egamiz oldida ular qoʻshiq aytar, ana, U kelayotir, Zaminni boshqarmoq uchun U kelayotir, Olamni adolat ila U boshqarar, Xalqlarni Oʻz haqiqati ila boshqarar.