Read Uzbek Muqaddas Kitob Zabur 96 Bible Online

Zabur 96 - Uzbek Muqaddas Kitob bible

Zabur 96

¹Egamiz Shohdir, zamin quvonsin, Dengiz ortidagi hamma yurtlar shod boʻlsin.

²Bulutlar, zimziyo zulmat Uning atrofini oʻragan, Adolatu haqiqat Uning taxtiga poydevor boʻlgan.

³Egamiz olovini Oʻzidan oldin yuboradi, Olovi har tarafdagi dushmanlarni yutadi.

⁴Chaqmoqlari olamni yoritadi, Zamin buni koʻrib titraydi.

⁵Butun olamning Rabbiysi oldida, Egamiz oldida togʻlar mumday eriydi.

⁶Samolar e’lon qiladi Uning adolatini, Jamiki xalqlar koʻradi Uning ulugʻvorligini.

⁷Butlarga sajda qiluvchilar, Behuda sanamlari ila maqtanuvchilar Sharmanda boʻladi. Barcha xudolar Egamizga ta’zim qiladi.

⁸Ey Egam! Sening adolatingdan Yahudo shaharlari shod boʻladi, Quddus[271] eshitib, quvonadi.

⁹Ey Egam, yer yuzidagi buyuk hukmdor Sensan, Hamma xudolardan Sen yuksalgansan.

¹⁰Ey Egamizni sevganlar! Yomonlikdan nafratlaning. U taqvodorlarining jonlarini Oʻzi asraydi, Fosiqlarning qoʻlidan ularni xalos etadi.

¹¹Solihlarga nur sochilgay, Yuragi poklar uzra shodlik yoyilgay.

¹²Ey solihlar, Egamiz tufayli shodlaning, Uning muqaddas nomini olqishlang!