Read Uzbek Muqaddas Kitob Hikmatlar 10 Bible Online

Hikmatlar 10 - Uzbek Muqaddas Kitob bible

Hikmatlar 10

¹Sulaymonning hikmatlari. Dono farzand otaga shodlik keltiradi, nodon farzand[44] esa onaga qaygʻu.

²Yovuzlik bilan topilgan boylikdan naf yoʻq, toʻgʻrilik esa oʻlimdan qutqaradi.

³Egamiz solihning och qolishiga yoʻl qoʻymaydi, lekin fosiqning xohishini bajo qilmaydi.

⁴Dangasa qoʻllar qashshoqlik keltiradi, tirishqoq qoʻllar esa boylik.

⁵Yoz paytida hosil yiqqan — dono oʻgʻil, oʻrim payti uxlagan esa otasiga uyat keltiradi.

⁶Solihning boshida — baraka, fosiqning tili esa yovuzlik konidir.

⁷Solihning xotirasi muborak boʻladi, fosiqning nomi yoddan koʻtariladi.

⁸Yuragida donolik boʻlgan amrlarni qabul qiladi, ezma nodon esa halok boʻladi.

⁹Toʻgʻri yurgan xavf — xatarni bilmaydi, yoʻldan ogʻgan esa jazo topadi.

¹⁰Koʻz qisgan qaygʻuga sabab boʻladi, ezma nodon halok boʻladi.

¹¹Solihning tili — hayot bulogʻi, fosiqning tili — yovuzlik koni.

¹²Nafrat janjal qoʻzgʻaydi, sevgi — muhabbat esa hamma gunohlarni kechiradi.

¹³Idroklining soʻzlarida — donolik, nodonning orqasida esa qamchi.

¹⁴Donolar bilimini orttiradi, nodonning tili esa halokat keltiradi.

¹⁵Boyning qal’asi — boyligi, kambagʻalning halokati esa kambagʻalligidadir.

¹⁶Solihning haqi — hayot, fosiqniki esa jazo.

¹⁷Nasihatga quloq solgan hayot yoʻlidadir, tanbehni tan olmagan yoʻldan adashadi.

¹⁸Nafratini yashirgan — yolgʻonchi, gʻiybat tarqatuvchi ahmoqdir.

¹⁹Gap — soʻz koʻp boʻlsa, janjal hech qachon toʻxtamaydi, tilini tiygan esa donodir.

²⁰Solihning tili oltin kabidir, fosiqning qalbi esa hech narsaga arzimaydi.

²¹Solihning tili koʻplarni oziqlantiradi, nodon esa aqlsizligi tufayli halok boʻladi.

²²Egamizning marhamati boylik keltiradi, Egamiz boylikka gʻam — tashvish qoʻshmaydi[45].

²³Ahmoq yomonlik qilishdan, aqlli esa donolikdan zavqlanadi.

²⁴Fosiq nimadan qoʻrqsa, oʻshanga duchor boʻladi, solih esa orzusiga yetishadi.

²⁵Quyundan keyin fosiqlar yoʻq boʻladi, solihlar esa abadiy mustahkamdir.

²⁶Dangasaga ish buyursang, u sen uchun tishga qoʻyilgan sirkaday, koʻzga kirgan tutunday boʻladi.

²⁷Egamizdan qoʻrqish[46] umrga umr qoʻshadi, fosiqning umri esa qisqaradi.

²⁸Solihning orzusi quvonch keltiradi, fosiqning niyati esa puchga chiqadi.

²⁹Egamizning yoʻli solihlar uchun qal’a, yomonlik qiladiganlar uchun esa halokatdir.

³⁰Solih hech qachon oʻrnidan qoʻzgʻatilmaydi, fosiq esa oʻsha yerda yashamaydi.

³¹Solihning tili donolik keltiradi, yomon til esa kesib tashlanadi.

³²Solihning tili marhamat keltiradi, fosiqning tili esa egrilik.