Read Uzbek Muqaddas Kitob Hikmatlar 11 Bible Online

Hikmatlar 11 - Uzbek Muqaddas Kitob bible

Hikmatlar 11

¹Yolgʻon tarozi Egamiz uchun jirkanchdir, aniq tarozi toshlari esa Uning quvonchidir.

²Magʻrurlik bilan sharmandalik keladi, donolik esa kamtarlar bilandir.

³Toʻgʻrilarning sofdilligi yoʻl koʻrsatsa, xoinlarning ikkiyuzlamachiligi halok qiladi.

⁴Qiyomat kunida boylik foyda bermaydi, solihlik esa oʻlimdan saqlaydi.

⁵Pokdilning solihligi yoʻlini toʻgʻrilaydi, fosiq esa fosiqligi tufayli qoqiladi.

⁶Toʻgʻrining solihligi najot beradi, sotqin esa yomon niyatlari tufayli tutiladi.

⁷Yovuz oʻlsa, orzu — umidlari ham oʻladi, fosiqning ham xohish — tilaklari poymol boʻladi.

⁸Solih gʻam — gʻussadan qutuladi, fosiq esa gʻamga duchor boʻladi.

⁹Imonsiz oʻz tili bilan qoʻshnisini halok qiladi, solih esa ilm — ma’rifati tufayli najot topadi.

¹⁰Solihning ishi yurishsa, el — yurt quvonadi, fosiq halok boʻlsa, tantana boʻladi.

¹¹Toʻgʻri odamlar tufayli shahar gullab — yashnaydi, fosiqning tilidan esa el — yurt vayron boʻladi.

¹²Qoʻshnisini kamsitgan aqlsizdir, idrokli sukut saqlaydi.

¹³Gʻiybatchi sirlarni ochadi, sodiq esa sir saqlaydi.

¹⁴Yoʻl — yoʻriq koʻrsatuvchisi boʻlmagan xalq halok boʻladi, maslahatchilar koʻp boʻlsa, gʻalaba keladi.

¹⁵Begonaga kafillik qilgan koʻp jabr koʻradi, kafil boʻlishdan nafratlanadigan esa tinchgina yuradi.

¹⁶Mehribon xotin izzat — hurmat topadi, zoʻravon esa boylikdan boshqa hech narsaga erishmaydi.

¹⁷Shafqatli inson oʻz joniga manfaat keltiradi, bagʻri tosh esa oʻziga zarar yetkazadi.

¹⁸Xudoning yoʻlidan yurganlar haqiqiy mukofotni, fosiqlar esa yolgʻon mukofotni oladilar.

¹⁹Solihlikni koʻzlagan inson hayotga, yomonlikni koʻzlagan esa oʻz oʻlimiga erishadi.

²⁰Egri yurak Egamizga jirkanch, poklarning ishlari esa Uning quvonchidir.

²¹Fosiq aslo jazosiz qolmaydi, solihning esa avlodlari ham najot topadilar.

²²Chiroyli, ammo farosatsiz ayol, burniga tilla sirgʻa taqqan choʻchqa misol.

²³Solihning xohishi faqat ezgulik, fosiqning kutganlari esa qahr — gʻazabdir.

²⁴Ba’zilarning qoʻli ochiq, ammo boyligi koʻpayaveradi. Ba’zilar haddan tashqari tejamkor, ammo qashshoqlashaveradi.

²⁵Saxiyning biri ikki boʻladi, boshqalarga yaxshilik qilganning oʻzi ham yaxshilik koʻradi.

²⁶Gʻallasini qizgʻanganni xalq qargʻaydi, sotganlarga esa baraka yogʻiladi.

²⁷Ezgulikka intilgan iltifot topadi, yomonlik qidirganga esa yomonlik keladi.

²⁸Boyligiga ishongan xonavayron boʻladi, solih esa barg kabi yashnaydi.

²⁹Oʻz oilasiga gʻam — tashvish keltiradiganlar meros olmaydi, nodonlar donoga qul boʻladi.

³⁰Solihlarning mahsuli — hayot daraxti, oqilu donolar odamlarning yuragidan joy oladi.

³¹Dunyoda solih qancha taqdirlansa, fosiq bilan gunohkor undan ham koʻproq jazolanadi.