Read Uzbek Muqaddas Kitob Hikmatlar 12 Bible Online

Hikmatlar 12 - Uzbek Muqaddas Kitob bible

Hikmatlar 12

¹Nasihatni sevgan ilm — ma’rifatni sevadi, tanbehdan nafratlanadigan esa ahmoqdir.

²Yaxshi odam Egamizning marhamatiga sazovor boʻladi, niyati buzuqni esa U jazoga hukm etadi.

³Inson yovuzlik bilan kamol topmaydi, solih hech qachon oʻrnidan qoʻzgʻatilmaydi.

⁴Yaxshi xotin erining boshidagi tojidir, erini uyaltiradigan xotin boshga balodir.

⁵Solihning fikri — zikri — adolat, fosiqning maslahati esa yolgʻondir.

⁶Fosiqning soʻzi qonga tashna, toʻgʻrining tili esa qutqaradi.

⁷Fosiq halokatga uchrab yoʻq boʻladi, solihning uyi esa mustahkam turadi.

⁸Insonni aql — idrokiga qarab ulugʻlaydilar, egri odam esa nafratga duchor boʻladi.

⁹Oʻzini katta tutib nonga zor boʻlgandan koʻra, oddiy boʻlib xizmatkor boʻlish yaxshiroq.

¹⁰Solih hayvonga ham mehribonlik qiladi, fosiqning rahmdilligi ham zolimlikdir.

¹¹Yerga ishlov bergan toʻyib non yeydi, bekor narsani koʻzlagan esa aqlsizdir.

¹²Fosiq yovuzlik toʻriga ilintiray deydi, solihning ildizi yashnaydi.

¹³Fosiq oʻz tilidan ilinadi, solih esa gʻamdan forigʻ boʻladi.

¹⁴Odam soʻzlari tufayli yaxshi narsaga erishadi, mehnati uni taqdirlaydi.

¹⁵Nodon oʻz yoʻlini toʻgʻri deb oʻylaydi, dono esa maslahatga quloq soladi.

¹⁶Nodon gʻazabini darhol bildiradi, aqli raso esa haqoratlanganini berkitadi.

¹⁷Toʻgʻri gapiradigan haqiqatni aytadi, soxta guvoh yolgʻon gapiradi.

¹⁸Oʻylamasdan aytilgan soʻz qilichday jarohatlaydi, dononing gaplari esa shifo beradi.

¹⁹Rostgoʻy lablar abadiydir, yolgʻon til esa bir lahzalikdir.

²⁰Yomon niyat qiladiganning yuragida yolgʻon, tinchlik oʻrnatuvchining yuragida esa quvonch bor.

²¹Solihga hech qanday zarar tegmaydi, fosiq esa gʻam — gʻussadan qutulmaydi.

²²Yolgʻonchi til Egamizga jirkanch, toʻgʻrilik bilan ish qiladiganlar esa Uning sevinchidir.

²³Aqlli bilimini koʻz — koʻz qilmaydi, nodon oʻz nodonligini oshkor qiladi.

²⁴Tirishqoq hukm suradi, dangasa esa qul boʻladi.

²⁵Yurakdagi qaygʻu — alam odamni ezadi, shirin soʻz esa yurakni shod etadi.

²⁶Solih oʻzgalarga yoʻl koʻrsatadi[47], fosiq esa yoʻldan adashtiradi.

²⁷Dangasa oʻljasini pishirishga ham erinadi, gʻayratli esa qimmatbaho boylikka ega boʻladi[48].

²⁸Solihlik yoʻli hayotga yetaklaydi, bu yoʻlda oʻlim yoʻqdir.