Read Uzbek Muqaddas Kitob Hikmatlar 14 Bible Online

Hikmatlar 14 - Uzbek Muqaddas Kitob bible

Hikmatlar 14

¹Dono xotin oʻz oilasini mustahkamlaydi, nodon xotin esa oilasini oʻzi buzadi.

²Toʻgʻri yoʻldan yuradigan Egamizdan qoʻrqadi[51], egri yoʻldan yuradigan esa Uni rad etadi.

³Ahmoqning soʻzlari oʻziga kaltak keltiradi, dononiki esa uni himoya qiladi.

⁴Hoʻkiz boʻlmasa oxur toza, lekin hoʻkizning kuchi tufayli hosil koʻp boʻladi.

⁵Sodiq guvoh yolgʻon gapirmaydi, soxta guvoh yolgʻon gapirishdan toʻxtamaydi.

⁶Mazax qiluvchi donolikni qidiradi, ammo topolmaydi, idrokliga esa bilim olish oson.

⁷Aqlsizdan uzoqlash, chunki undan ma’noli soʻz chiqmaydi.

⁸Ziyrakning donoligi oʻz yoʻlini bilishidadir, aqlsizning ahmoqligi esa uni yoʻldan adashtiradi.

⁹Ahmoq odam ayb qurbonligi ustidan kuladi[52], toʻgʻri odam esa Xudoning marhamatiga sazovor boʻladi.

¹⁰Yurak oʻz dardini oʻzi biladi, uning shodligini ham hech kim toʻliq tushunmaydi.

¹¹Fosiqlarning uyi xaroba boʻladi, solihlarning xonadoni esa gullab — yashnaydi.

¹²Shunday yoʻl borki, insonga toʻgʻri boʻlib koʻrinadi, ammo oxiri oʻlimga olib boradi.

¹³Kulsa ham yurakda qaygʻu bor, xursandchilikning oxiri gʻamdir.

¹⁴Yuragi qingʻir oʻz egriligidan, yaxshi odam esa toʻgʻriligidan mamnun.

¹⁵Sodda[53] har bir soʻzga ishonaveradi, aqlli esa qadamini oʻylab bosadi.

¹⁶Dono qoʻrqib yomonlikdan uzoqlashadi, nodon esa jahli tez va beparvo[54].

¹⁷Badjahl aqlsizlik qiladi, badniyat nafratga uchraydi.

¹⁸Soddalarning nasibasi — nodonlik, aqllilarning toji esa ilmu ma’rifatdir.

¹⁹Yomonlar yaxshilarning oldida, fosiqlar solihlarning darvozasida ta’zim qiladi.

²⁰Kambagʻaldan qoʻshnilari ham nafratlanadi, boyning esa oʻrtoqlari koʻp.

²¹Qoʻshnisini xor qilgan — gunohkor, muhtojga marhamat qilgan esa baxtlidir.

²²Niyati buzuqlar yoʻldan adashadi. Yaxshi niyatlilar esa sevgi va sadoqatga sazovor boʻladi.

²³Har bir mehnatdan foyda bor, quruq gap esa kambagʻallik keltiradi.

²⁴Oqillarning toji — donoligi, aqlsizning nodonligi esa ahmoqligidir.

²⁵Rostgoʻy guvoh jonni qutqarsa, yolgʻonchi guvoh aldaydi.

²⁶Egamizdan qoʻrqish — mustahkam qal’a, farzandlariga ham Oʻzi panohdir.

²⁷Egamizdan qoʻrqish hayot manbaidir, bunday xislat odamni oʻlim tuzogʻidan asraydi.

²⁸Xalqning koʻpligi — shohning shuhrati, kamligi esa hokimning halokatidir.

²⁹Sabr — toqatli odam aql — idroklidir, jahldorlik ahmoqlikni bildiradi.

³⁰Xotirjam yurak tanaga hayot baxsh etadi, hasadgoʻylik esa suyaklarni chiritadi.

³¹Kambagʻalga zulm qilgan Yaratuvchini tahqirlagan boʻladi, muhtojga yordam bergan esa Xudoni ulugʻlagan boʻladi.

³²Fosiq oʻz qilmishlari tufayli halokatga uchraydi, solih esa oʻlimda ham panoh topadi.

³³Donolik oqilning qalbida yashaydi, nodonlar orasida ham oʻzini bildiradi[55].

³⁴Solihlik xalqni yuksaltirsa, gunoh sharmanda qiladi.

³⁵Donolik bilan ish qiladigan qul shohning marhamatiga sazovordir, sharmandali ish qiladigan esa uning gʻazabiga uchraydi.