Read Uzbek Muqaddas Kitob Hikmatlar 15 Bible Online

Hikmatlar 15 - Uzbek Muqaddas Kitob bible

Hikmatlar 15

¹Yumshoq javob gʻazabni qaytaradi, qattiq soʻz esa jahl chiqaradi.

²Donolar tilidan ilm — hikmat yogʻilsa, nodonlardan ahmoqlik chiqadi.

³Egamizning koʻzlari hamma joyda, U yaxshiyu yomonni koʻrib turadi.

⁴Shirin soʻz — hayot daraxti, buzuq til — jonning halokati.

⁵Otasining nasihatini ahmoq rad etadi, tanbehga quloq solgan esa idroklidir.

⁶Solihning uyida boylik koʻp, fosiqning hosili esa tashvish keltiradi.

⁷Dononing tili bilim tarqatadi, ahmoqning qalbi esa unday emas.

⁸Fosiqning qurbonligi Egamizga jirkanchdir, toʻgʻrining ibodati esa Uning quvonchi.

⁹Fosiqning ishlari Egamizga jirkanchdir, solihlikka intilganni esa U sevadi.

¹⁰Toʻgʻri yoʻlni tashlab ketgan qattiq jazo oladi, tanbehdan nafratlangan oʻladi.

¹¹Hatto Oʻlim[56] va Halokat[57] ham Egamiz nigohi ostida ekan, odamzodning qalbi Unga hech narsa emas.

¹²Masxara qiluvchi tanbeh berganlarni yoqtirmaydi, u donolar oldiga ham bormaydi.

¹³Yurak shod boʻlsa, chehra ochiq, gʻamgin boʻlsa, ruh tushkundir.

¹⁴Zakovatli yurak ilm qidiradi, aqlsizning ogʻzi ahmoqlik izlaydi.

¹⁵Qiynalganlarga har kun tashvish, lekin yuragida shodlik boʻlsa, doimo bayram.

¹⁶Koʻp boylikka ega boʻlib vahima bilan yashagandan koʻra, Egamizdan qoʻrqib[58] ozgina boylik bilan yashash yaxshiroq.

¹⁷Goʻsht yeb nafrat bilan yashashdan, sabzavot yeb sevgi bilan yashagan afzalroq.

¹⁸Badjahl janjal chiqaradi, jahlni tiyadigan esa tinchlantiradi.

¹⁹Dangasaning yoʻli tikanli chetan devor kabi, toʻgʻrining soʻqmogʻi esa katta ravon yoʻldir.

²⁰Aqlli farzand[59] otasini quvontiradi, aqlsiz esa onasini xor qiladi.

²¹Ahmoqlik vijdonsizga quvonchdir, aqlli esa toʻgʻri yuradi.

²²Maslahat boʻlmagan joyda ish yurishmaydi, maslahatchi koʻp boʻlsa, muvaffaqiyatli boʻladi.

²³Odam yaxshi javobi tufayli quvonadi, oʻz vaqtida aytilgan soʻz qanchalik yaxshi.

²⁴Donoga tepadagi hayot soʻqmogʻi pastdagi oʻliklar diyoridan uzoqlashish uchundir.

²⁵Egamiz takabburning uyini vayron qiladi, bevaning mol — mulkini saqlaydi.

²⁶Fosiqning niyatlari Egamizga jirkanch, yoqimli soʻzlar esa pokdir.

²⁷Ochkoʻz oʻz uyiga tashvish keltiradi, poradan nafratlanadigan esa yashaydi.

²⁸Solih oʻylab javob beradi, fosiqning ogʻzidan esa yomonlik chiqaveradi.

²⁹Egamiz fosiqlardan uzoqda, lekin solihlarning ibodatini eshitadi.

³⁰Koʻzdagi nur koʻngilni xushnud etadi, xushxabar tan — jonga oziq beradi.

³¹Hayotbaxsh nasihatga quloq solgan donolarning orasida boʻladi.

³²Nasihatni rad qilgan oʻz jonini xor qiladi, tanbehga quloq solgan esa idrokli boʻladi.

³³Egamizdan qoʻrqish donolikni oʻrgatadi, kamtarlik izzatu ikromga sazovor qiladi.