Read Uzbek Muqaddas Kitob Hikmatlar 16 Bible Online

Hikmatlar 16 - Uzbek Muqaddas Kitob bible

Hikmatlar 16

¹Rejalar odamning yuragida, tildagi javob esa Egamizdan.

²Odamning qilmishlari uning nazarida toʻgʻri, lekin Egamiz yurakning pokligini oʻlchaydi.

³Ishlaringni Egamizga topshir, shunda rejalaring mustahkam boʻladi.

⁴Hamma narsani Egamiz Oʻz maqsadi bilan yaratgan, hatto fosiqlarning ham qismatini belgilab qoʻygan.

⁵Barcha takabburlar Egamizga jirkanch, ular jazosiz qolmaydilar.

⁶Sevgi va sadoqat tufayli gunoh kechiriladi, Egamizdan qoʻrqish[60] yomonlikdan uzoqlashtiradi.

⁷Egamizga insonning yoʻllari ma’qul kelganda, dushmanlari bilan ham yarashtiradi.

⁸Adolatsiz kelgan koʻp daromaddan, halol mehnat bilan topilgan ozginasi yaxshiroq.

⁹Odam yuragida niyat qiladi, uning qadamini esa Egamiz boshqaradi.

¹⁰Xudoning soʻzlari shohning tilida, hukm qilganda xato qilmaydi.

¹¹Toʻgʻri taroziyu pallalar Egamiznikidir, tarozi toshlarini ham Xudo yaratgan.

¹²Shohning yomonlik qilishi qabihlikdir[61], chunki uning taxti adolat tufayli mustahkam.

¹³Toʻgʻri soʻz shohning quvonchidir, u rostgoʻylarni yaxshi koʻradi.

¹⁴Shohning gʻazabi oʻlim darakchisidir, dono uni tinchlantiradi.

¹⁵Shoh yuzidagi tabassum hayotdan nishona, uning marhamati yomgʻir keltiradigan bulut kabidir.

¹⁶Dono boʻlish — oltindan, idrok topish esa kumushdan ham yaxshiroqdir.

¹⁷Toʻgʻrining yoʻli yomonlikdan uzoqlashtiradi, qadamini bilib bosgan odam oʻz jonini asraydi.

¹⁸Magʻrurlikning ortidan halokat keladi, takabburlikdan soʻng esa odam qoqiladi.

¹⁹Takabburlar bilan oʻlja boʻlishgandan koʻra, kamtarin boʻlib kambagʻallar orasida yashash yaxshiroq.

²⁰Gapga tushunadigan yaxshilik topadi, Egamizga umid bogʻlagan baxtli boʻladi.

²¹Qalbida donolik boʻlgan farosatli deb ataladi, shirinsuxanlik aql — idrokni koʻpaytiradi.

²²Idrok oʻzining sohibi uchun hayot bulogʻi, ahmoqlik esa ahmoqqa jazodir.

²³Dononing yuragi tiliga idrok beradi, soʻzlarini ishonchli qiladi.

²⁴Yoqimli soʻz asal kabidir, jonga rohat, suyaklarga malhamdir.

²⁵Shunday yoʻl borki, insonga toʻgʻri boʻlib koʻrinadi, ammo oxiri oʻlimga olib boradi.

²⁶Mehnat qiladigan odam oʻzi uchun ishlaydi, chunki och qorni uni undaydi.

²⁷Yaramas odam yomonlikni qoʻzgʻaydi, soʻzlari kuydiradigan olov kabidir.

²⁸Makkor janjal chiqaradi, gʻiybatchi esa yaqin doʻstlarni ajratadi.

²⁹Yovuz oʻzgani aldab, yomon yoʻlga boshlaydi.

³⁰Koʻzini qisgan — yomon niyatda, labini tishlagan esa yovuzlik qilgan.

³¹Oqargan sochlar — sharofat toji, solihlik yoʻlida yurgan unga erishadi.

³²Jahlini tiygan — qudratlidan, oʻzini tuta biladigan esa shaharni yenggandan yaxshiroq.

³³Qur’a tashlanadi[62], ammo barcha qaror Egamizdandir.