Read Uzbek Muqaddas Kitob Hikmatlar 17 Bible Online

Hikmatlar 17 - Uzbek Muqaddas Kitob bible

Hikmatlar 17

¹Dasturxoni toʻla janjalli uydan, bir tishlam qattiq noni bor tinch xonadon yaxshiroq.

²Sharmandali ish qiladigan oʻgʻil ustidan farosatli qul hukmronlik qiladi, u xoʻjayinining oʻgʻillari qatori merosga sherik boʻladi.

³Kumush va oltin olovda sinaladi, odamlarning qalbini esa Egamiz sinaydi.

⁴Fosiqlar yovuz odamlarning gapiga kiradi, yolgʻonchilar esa gʻiybatga quloq soladi.

⁵Kambagʻalni mazax qilgan odam ularni Yaratganni tahqirlaydi, birovning baxtsizligidan quvongan jazosiz qolmaydi.

⁶Nabiralar — keksalarning toju taxti, otalar oʻgʻillarning shon — shuhratidir.

⁷Yaxshi soʻz nodonga yarashmagandek, yolgʻon ham ulugʻsifat odamga aslo toʻgʻri kelmaydi.

⁸Oʻz egasining nazarida pora sehrli qimmatbaho tosh, goʻyo hamma yerda omad keltiradi.

⁹Gunohni kechirgan doʻstlikni saqlaydi, uni kavlashtirgan esa doʻstni uzoqlashtiradi.

¹⁰Donoga berilgan bitta tanbeh nodonning boshida singan yuzta kaltakdan ta’sirliroq.

¹¹Fosiq faqat gʻalayon payida boʻladi, shuning uchun unga yovuz elchi yuboriladi.

¹²Tentakning ahmoqligiga yoʻliqqandan koʻra, bolalaridan ayrilgan ona ayiqqa duch kelgan yaxshiroq.

¹³Yaxshilikka yomonlik qilganning xonadonidan yomonlik arimaydi.

¹⁴Janjalning boshlanishi — suv urib ketishiga oʻxshaydi, janjal chiqmasdan uni toʻxtat.

¹⁵Fosiqni oqlash, solihni ayblash — ikkovi ham Egamizga jirkanchdir.

¹⁶Bu nima?! Nodonning qoʻlida boylik bor, “Donolik sotib olay”, — deydi, lekin unda aql yoʻq.

¹⁷Haqiqiy doʻst har doim sevadi, aka — ukalar ham ogʻir kun uchun tugʻilgan.

¹⁸Qoʻl tashlab birovga kafillik qiladigan aqlsizdir[63].

¹⁹Gunohni yaxshi koʻrgan urush — janjalni sevar, oʻziga bino qoʻygan[64] halokat qidirar.

²⁰Yuragi makkor odam yaxshilikka erishmaydi, egri til kulfatga duchor boʻladi.

²¹Nodon farzand koʻrgan qaygʻu chekadi, ahmoqning otasi shodlik nimaligini bilmaydi.

²²Shod yurak — shifobaxsh dori, gʻam — kulfat esa jonning egovidir.

²³Fosiq qoʻynidan pora olib adolat yoʻlini oʻzgartiradi.

²⁴Fahm — farosatli inson donolikka qaraydi, nodonning koʻzi esa dunyoning narigi chetida.

²⁵Ahmoq farzand[65] — otasiga qaygʻu, uni tuqqan onaga gʻamdir.

²⁶Solihni jazolash, amaldorni odilligi uchun koyish yaxshi emas.

²⁷Kam gapirgan — dono, ogʻir, vazmin odam idroklidir.

²⁸Hatto ahmoq ham indamay oʻtirganda dono boʻlib koʻrinadi, tilini tiyib turgan farosatli hisoblanadi.