Read Uzbek Muqaddas Kitob Hikmatlar 18 Bible Online

Hikmatlar 18 - Uzbek Muqaddas Kitob bible

Hikmatlar 18

¹Boshqalardan ajralgan oʻz istagini qondirishni xohlaydi, u hamma dono nasihatga qarshi chiqadi.

²Nodon aql — idrokni yoqtirmaydi, faqat oʻzini koʻrsatadi.

³Fosiqlik dastidan sharmandalik keladi, hurmatsizlik esa uyat keltiradi.

⁴Dono soʻzlar chuqur suvlarday tuganmasdir, donolik bulogʻi oshib — toshgan irmoqdir.

⁵Fosiqning tarafini olish, hukmda solihni ayblash yaxshi emas.

⁶Ahmoqning tili janjal chiqaradi, soʻzlari esa kaltak keltiradi.

⁷Ahmoqning tili oʻziga halokat, soʻzlari joniga tuzoqdir.

⁸Gʻiybatchining soʻzi shirin ovqat kabidir, odamning butun a’zoyi badaniga singib ketadi.

⁹Ishda dangasa boʻlgan odam buzgʻunchiga ogʻaynidir.

¹⁰Egamizning nomi mustahkam qal’adir, solih u yerga borib eson — omon boʻladi.

¹¹Boyning boyligi qal’asidir, uning nazarida shaharning baland devori kabidir.

¹²Takabburlik halokatga olib boradi, kamtarlik esa izzatu ikromga sazovor qiladi.

¹³Oxirigacha tinglamay javob bergan ahmoqdir, u sharmanda boʻladi.

¹⁴Odamning ruhi kasallikka chiday oladi, lekin tushkun ruhga kim toqat qila oladi?!

¹⁵Aqllining qalbi bilim oladi, dono ilmu ma’rifatga intiladi.

¹⁶Sovgʻa egasiga hamma eshiklarni ochadi, katta odam oldiga olib boradi.

¹⁷Birinchi gapirgan odam boshqasi kelib tekshirmaguncha, haq koʻrinadi.

¹⁸Qur’a[66] janjalni toʻxtatadi, kuchli raqiblarni ham ajratadi.

¹⁹Xafa boʻlgan birodarga yaqinlashish kuchli shaharni olishdan ham qiyin, oʻrtadagi janjal qal’aning qulfiga oʻxshaydi.

²⁰Odamning qorni ogʻzining mahsuli bilan toʻyadi, tilining samarasi bilan qoniqadi.

²¹Oʻlim ham, hayot ham tilning hukmidadir, birisini sevgan mevasini yeydi.

²²Xotin topgan baxt topib, Egamizning marhamatiga sazovor boʻladi.

²³Kambagʻal iltijo bilan gapiradi, boy esa qoʻpol javob beradi.

²⁴Shunday doʻst borki, u halokat keltiradi, doʻst borki, u tugʻishgandan ham yaqinroqdir.