Read Uzbek Muqaddas Kitob Hikmatlar 2 Bible Online

Hikmatlar 2 - Uzbek Muqaddas Kitob bible

Hikmatlar 2

¹Oʻgʻlim[10], nasihatlarimni qabul qilib, amrlarimni yuragingda saqlasang,

²donolikka quloq solib, qalbingni fahm — idrokka ochsang,

³farosatga tashna, idrokka chanqoq boʻlsang,

⁴uni kumush izlaganday izlasang, yashirin xazina qidirganday qidirsang,

⁵Egamizdan qoʻrqish[11] nimaligini tushunasan, Xudo kimligini bilasan.

⁶Chunki donolikni Egamiz beradi, bilim va idrok Uning ogʻzidan chiqadi.

⁷Egamiz toʻgʻri odamni eson — omon saqlaydi, toʻgʻri yuradiganga Oʻzi qalqon boʻladi.

⁸Adolatli insonni himoya qiladi, Unga sodiq boʻlganning yoʻlini qoʻriqlaydi.

⁹Shunda sen toʻgʻrilik, adolat, odillik, ya’ni toʻgʻri yoʻl nima ekanligini tushunasan.

¹⁰Chunki yuragingga donolik kiradi, ruhing esa bilimdan zavqlanadi.

¹¹Fahm — farosat seni himoya qiladi, aql — idrok seni qoʻriqlaydi.

¹²Yomon yoʻldan, yovuz gapiradiganlardan asraydi.

¹³Ular toʻgʻri yoʻlni tashlab, qorongʻilikda yuradi.

¹⁴Yomon ishlardan xursand boʻladi, yovuzlikdan quvonadi.

¹⁵Ular yoʻldan adashgan, soʻqmoqlari ham egridir.

¹⁶Donolik seni zinokordan, tilyogʻlama buzuq ayoldan saqlasin.

¹⁷Buzuq ayol yoshligidagi umr yoʻldoshini tashlab, Xudo oldida bergan ahdini buzgan.

¹⁸Uning uyi oʻlimga[12], yoʻllari oʻliklarning oldiga olib boradi.

¹⁹Uning oldiga borgan odam qaytib kelmaydi, hayot soʻqmoqlariga qaytib qadam bosmaydi.

²⁰Shuning uchun yaxshi odamlarning yoʻlidan yurgin, solihlarning yoʻlidan chiqmagin.

²¹Chunki toʻgʻri odam oʻsha yerda yashaydi, pok odam u yerda qoladi.

²²Fosiq esa yer yuzidan qirib tashlanadi, vafosiz yoʻq qilinadi.