Read Uzbek Muqaddas Kitob Hikmatlar 20 Bible Online

Hikmatlar 20 - Uzbek Muqaddas Kitob bible

Hikmatlar 20

¹Sharob — mazaxchi, aroq — janjalkash, ularga aldanganlar nodondir.

²Shohning gʻazabi — sherning oʻkirishiday, uning jahlini chiqargan jonidan mahrum boʻladi.

³Janjaldan oʻzini tortish — insonning hurmati, ahmoq esa janjalga aralashadi.

⁴Dangasa kuzda[71] yer haydamaydi, oʻrim payti esa qidirib hech narsa topolmaydi.

⁵Insonning fikrlari — chuqur suv kabidir, fahmli odam ularni tashqariga chiqara oladi.

⁶Koʻpchilik oʻzini sodiq deb aytadi, haqiqatan ham sadoqatli boʻlganni topib koʻr — chi!

⁷Solih halol yashaydi, uning bolalari naqadar baxtlidir!

⁸Hukmronlik qilayotgan shoh oʻz koʻzi bilan barcha yomonliklarni ajratadi.

⁹“Qalbimni tozaladim, gunohimdan xoliman”, deb kim ayta oladi?!

¹⁰Ikki turli tarozi toshi va notoʻgʻri oʻlchov — ikkovi ham Egamizga jirkanchdir.

¹¹Hatto yosh bolani ham xulqidan, toʻgʻriligini va pokligini ishlaridan bilsa boʻladi.

¹²Eshitadigan quloq, koʻradigan koʻz — ikkovini ham Egamiz yaratgan.

¹³Uyquni yaxshi koʻrma, boʻlmasa kambagʻal boʻlasan, koʻzlaringni och, qorning toʻyadi.

¹⁴Xaridor: “Yaxshi emas, yaxshi emas!” deydi — yu, nariroqqa borib maqtanadi.

¹⁵Oltin bor, yoqut toshlar ham koʻp, biroq eng qimmatbaho narsa — bilimli til.

¹⁶Begonaga kafillik qilganning[72] toʻnini yechib ol, ha, bunday aqlsiz odamdan kiyimini garov qilib ol.

¹⁷Nohaqlik bilan topilgan non shirin, ammo keyin ogʻiz tuproq bilan toʻladi.

¹⁸Maslahat bilan reja tuz, aqlli yoʻl — yoʻriq bilan urush olib bor.

¹⁹Chaqimchi sirlarni ochadi, ogʻzi boʻsh odam bilan aloqada boʻlma.

²⁰Kim ota — onasini la’natlasa, uning chirogʻi zulmatda oʻchib qoladi.

²¹Boshida shoshilib olingan meros oqibatda baraka keltirmaydi.

²²Yovuzlik uchun qasos olaman demagin, Egamizga umid bogʻlab kutgin, U seni qutqaradi.

²³Ikki xil tarozi toshi Egamizga jirkanchdir, yolgʻon tarozi ham yaxshi emas.

²⁴Insonning qadami — Egamizdan, shunday ekan, u oʻz yoʻlini qanday tushunsin?!

²⁵Oʻylamasdan Xudoga va’da bergan kishi, ahd qilgandan keyin ikkilangan odam tuzoqdadir.

²⁶Dono shoh yovuzlarni ajratib, ularning ustidan tegirmon toshi yurgizadi.

²⁷Odamning ruhi — Egamizning chirogʻi, vujudning barcha chuqurliklarini tekshirib turadi.

²⁸Sevgi va sadoqat shohni asraydi, oʻsha inoyat tufayli uning taxti mustahkamdir.

²⁹Quvvat yigit kishining gʻururidir, oqargan sochlar esa keksaning shuhratidir.

³⁰Qamchining jarohati yomonlikka davodir, kaltak zarbi vujudning eng chuqur joylarini tozalaydi.