Read Uzbek Muqaddas Kitob Hikmatlar 21 Bible Online

Hikmatlar 21 - Uzbek Muqaddas Kitob bible

Hikmatlar 21

¹Shohning yuragi Egamizning qoʻlida, uni irmoqday xohlagan tomonga buradi.

²Odamning qilmishlari oʻzining nazarida toʻgʻri, ammo Egamiz yuraklarni sinaydi.

³Adolatu haqiqatga amal qilish Egamizga qurbonlikdan afzalroqdir.

⁴Takabbur koʻzlar va magʻrur yurak chiroq kabi fosiqning gunohini koʻrsatadi.

⁵Mehnatkashning rejasi faqat moʻl — koʻlchilik keltiradi, shoshqaloq kambagʻallikka duchor boʻladi.

⁶Yolgʻon bilan boylik topadiganlar chiqib ketadigan bugʻ kabidir, ular oʻz oʻlimini izlaydi.

⁷Yovuzning zoʻravonligi oʻz boshiga yetadi, chunki u adolat bilan ish qilishni rad etadi.

⁸Gunohkorning yoʻli — egri, sofdilning ishi — toʻgʻri.

⁹Urishqoq xotin bilan keng uyda yashagandan koʻra, loy tomning bir chetida yashagan yaxshiroq.

¹⁰Yovuzning koʻngli yomonlikka tashna, qoʻshnisi undan rahm — shafqat topmaydi.

¹¹Mazax qiluvchi jazolansa, sodda[73] odamlar dono boʻladi, donoga yoʻl — yoʻriq berilsa, bilimi oshadi.

¹²Xudo odildir, fosiqning uyini U kuzatib turadi, fosiqni halokatga mubtalo qiladi.

¹³Kambagʻalning faryodiga kim quloq solmasa, oʻzi faryod qilganda ham hech kim javob bermaydi.

¹⁴Yashirincha berilgan sovgʻa jahlni yumshatadi, yeng ichidagi pora gʻazabdan tushiradi.

¹⁵Adolatga amal qilish solihlarga sevinch, fosiqlarga esa qoʻrqinchdir.

¹⁶Aql — idrok yoʻlidan chiqqanlar oʻliklar orasidadir.

¹⁷Ziyofatni sevgan qashshoqlashadi, sharob bilan moyni yaxshi koʻrgan odam boy boʻlmaydi.

¹⁸Solihga atalgan yovuzlik fosiqning boshiga tushadi, toʻgʻri odamning oʻrniga xoin halokatga uchraydi.

¹⁹Urishqoq va badjahl xotin bilan yashagandan koʻra, choʻlu biyobonda yashash yaxshiroq.

²⁰Dononing uyida yogʻ ham, eng yaxshi narsalar ham bor, aqlsiz esa uni sarflab yuboradi.

²¹Toʻgʻrilik va sadoqat payida boʻlganlar uzoq umr, solihlik va shon — shuhratga erishadi.

²²Dono eng qudratli shaharga borib, tayanch boʻlgan qal’ani ham vayron qiladi.

²³Ogʻzini va tilini qoʻriqlagan oʻz jonini tashvishlardan asraydi.

²⁴Takabbur va magʻrurning nomi “mazaxchi”, hamma narsani manmanlik bilan qiladi.

²⁵Dangasaning orzusi oʻlimga olib keladi, chunki qoʻllari ishga bormaydi.

²⁶Dangasaning kuni badnafslik bilan oʻtadi, solih esa ayamasdan beradi.

²⁷Fosiqlarning qurbonligi jirkanchdir, yovuz niyat bilan keltirilgani esa undan ham battar.

²⁸Soxta guvoh yoʻq boʻladi, haqiqatga quloq solgan esa qoladi.

²⁹Fosiqning yuzi qattiq, solih esa oʻz yoʻlini biladi.

³⁰Egamizga qarshi donolik ham, idrok ham, reja ham yoʻq.

³¹Ot jang kuni uchun tayyorlanadi, gʻalaba esa Egamizning qoʻlida.